Myaso 46
46
Njambi ali netu
Mwaso wa cikota ca Kola
1Njambi ikeye vutewelo vwetu na nzili yetu,
wakala muyehi-yehi netu
nakutukwasa a simbu ya tuyando.
2Ngecivene, kutwasa kuziva lyova,
nameme nga kaye kajaja,
na minkinda iwila mu vinzinga vya mema a kalunga,
3nameme mema a kalunga akuma
ngwe mwakohyo kasitu,
nakulinga kalwa manene,
co malundu aninganga manene na vukalu vwao.
4Kuyili ndonga ije ivwaelelesa nganda ya Njambi,
ije ivwaelelesa mwela wakujela kuje kwakala wa Akamwa ya Akamwa.
5Njambi ikeye wakala muje mu nganda,
co naumo wai akainyongesa,
oloni akaikwasa a mungulungengu.
6Miyati ya vanu vakavazivisa lyova,
na vumwene vukawa,
omo Njambi akaluma,
co asi akanyongolokota.
7Shukulu Kalunga Muka-nzili yoshe ali netu,
Njambi ya Yakomba ikeye vutewelo vwetu!
8Ijeni mumone vipangi vyanapanga Shukulu Kalunga!
Kengeni vyuma vyakukomokesa vije vyanalingi asi.
9Ikeye amanesa vinzita ano asi oshe,
akapokozola mata a lusipa na makunga,
enyeka vintelo na tuhya!
10Njambi nendeka ngwendi,
“Olokeni kuluu,
zivukeni ngeci yange nji Njambi,
nji wakama akati ka miyati yoshe,
co nji wakama lalo ano asi oshe!”
11Shukulu Kalunga Muka-nzili yoshe ali netu,
Njambi ya Yakomba ikeye vutewelo vwetu!
The Bible in Mbunda ©The Bible Society of Zambia, 2006