Myaso 45
45
Mwaso wa vulo vwa vumwene
Mwaso wa cikota ca Kola
1Mbunge yange inashulu na majwi amavwa,
omo njilinakumanga mwaso ou kuli mwene,
ndaka yange inafu ngwe munu uje azivuka
kusoneka mwamuvwa.
2Yove uwamuvwa manene
kutuvakana vanalume voshe,
u muka-kwendeka na ngozi,
visimbu vyoshe Njambi alinakukuvezikisa!
3Maneka moko yove ya mukwale mu mbunda,
yove cingenyenye,
yove wapwa wa vumpau na vukama!
4Mu vukama vwove enda nakuvezika,
omwo ya vushunga na kulikeesa na kulongwa!
Co livoko lyove lya cilyo likakulongesa
vyuma vyakama vyakukomokesa!
5Mikili yove yapwa yakuvambuka,
ikeyo itiva vimbunge vya vitozi vove,
miyati ya vanu valundumuke ku mendi ove.
6Litanda lyove lya vumwene yove Njambi,#45:6 LITANDA LYOVE LYA VUMWENE YOVE NJAMBI: Nambe, vumwene vuje vwanakwana Njambi vukakalako ku myaka yoshe.
likakalako ku myaka yoshe!
Mulamu wa vumwene vwove ukewo mulamu wa vushunga.
7 #
VaHe 1:8-9
Uzema vushunga nakuzinda vuvi,
mukemwo Njambi, Njambi yove,
nakuvezikisa vivezikiso vyakama
kutuvakana vimyene veka.
8Vuzalo vwove vunika lwengo lwa miila
nolu lwa malimangango,
vaka-kwimba valinakukuvwaelelesa
mu lipela lyakutaleka na mayo a vinjamba.
9Akati ka vanakazi va kasingimiko vali mu lipela lyove
vanapu vana va vamwene,
co ku litanda lya cilyo kunemana vamwene,
nazala vyakuzala vya senga
vya ngolinde yaivwa manene.
10Yove shombolwa ya mwene,
tolilila vije njikuleka,
kesi utolilile kunangula kwa vanu vove na vavushoko vwove.
11Vuvwa vwove vukavwaelelesa mwene ngeci akuzeme,
ikeye napu shukulu yove,
ngecivene, unapande kumwononoka.
12Vanu va ku lifuti lya Tile vakakunenela vwana,
co vanu vaka-kufuka vakakushangazala.
13Vamwene vakovela mu lipela.
Vuzalo vwavo vwakushoveya na ngolinde.
14Vakavatwala kuli mwene oku vanazala
cikoveyo cakushoveya cacilaja mavoko,
co tushambeyeyo twavo va vanakazi vakavasindikiya,
na vakevo lalo vakavanena kuli yove.
15Vakaija nakujolela nakuvwaelela,
omo vakukovela mu lipela lya mwene.
16Yove mwene yange,
ukakala na vana va vanalume vavangi
vakainga vakukulwila vove kupwa vimyene,
co ukavapwisa vaka-kushwana ano asi oshe.
17Njikatsimanesa lizina lyove ku cisemwa coshe,
ngecivene, vanu voshe vakakulemesa ku myaka yoshe.
The Bible in Mbunda ©The Bible Society of Zambia, 2006