Myaso 44
44
Lilombelo lyakunyunga
Mwaso wa cikota ca Kola
1Yove Njambi, tunazivi laja na matwi etu,
vakukulwila vetu vatulekele laja,
vyuma vyakama vije viwalingile a simbu yavo,
ku matangwa a ku san̄ulu.
2Yove washekelemo vaka-kujeneka
kukulaela kuli yove Shukulu Kalunga,
co waakele vanu vove mu lifuti lyavo,
yove wahisile miyati ikwavo lalo,
co wakongweyeye vove.
3Vanu vove kuvafungulwile lifuti lije
na mikwale yavo embwe,
nambe kushwana lifuti mu nzili yavo embwe,
oloni eyi yapwile nzili yove na moko yove,
a lizivasano lyove,
nakuvamwesa ngeci yove wavazema.
4Yove unapu u mwene yange na Njambi yange,
yove ukahyanesa vanu vove.
5Mu nzili yove tukafungulwila asi vitozi vetu.
Mu lizina lyove tukalyatangela vaka-kutulwisa.
6Omwo kunjikakulaela vuta vwange vwa lusipa,
nambe mukwale wange kuwasa kunjamena,
7oloni unatwamena ku vitozi vetu,
co yove unazivisa shwamwa vaka-kutuzinda.
8Simbu yoshe tukalyalesela muli yove,
co tukakandelela lizina lyove ku myaka yoshe.
9Oloni ololo unatuvyana nakutwecelela
ku vitozi vetu ngeci vatufungulule,
co kuwesi nakwenda lalo amo na mashwalale vetu.
10Yove watavele ngeci tutewe ku vitozi vetu,
co vapukwile vyuma vyetu.
11Yove watavele ngeci vatutsiye ngwe vimanga,
co watushandwelele ku mafuti eka.
12Yove walandesele vanu vove ngwe vindungo
na ndando yaindondo, co kuwawaneneo nganyo.
13Vandambo vetu vamwene vije viwalingile kuli yetu,
co vatushendumwine nakutujola.
14Unatupwisa cuma cakushauka akati ka miyati,
valinakulipika ku mitwe yavo omwo yetu, nakutushendumuna.
15Simbu yoshe njilinakushauka,
co njilinakuziva shwamwa manene,
16ku majwi akuyeluwisa
naa akushaula aje vendeka vitozi vange na vaje vanjizinda.
17Vyuma vyoshe vije vyalingiwile kuli yetu,
nameme yetu kutwakwivalele,
nambe kupokola cikumiiyo cije walikumiiye netu.
18Kutwapwile vaka-kujeneka kulongwa kuli yove,
co kutwapwile vaka-kujeneka kwononoka mashiko ove.
19Oloni yove unatwecelela ngoco mukati ka tusitu,
co unatumbila mu lisusulungu vwii.
20Nga twalikelele kulemesa Njambi yetu,
nakulombela kuli njambi weka,
21mwa vushunga ngwe kuwavisholwele ndi?
Omwo yove uzivuka viyongola vyakushweka
vya mu vimbunge.
22 #
Lom 8:36
Oloni omwo ali yove mukemwo valinakututsiya simbu yoshe,
valinakutupwisa ngwe vimanga vaje valinakuya nakuvatsiya.
23Induka yove Shukulu Kalunga,
omwo vikajo unalalela?
Induka! Kesi utumbile kuti myaka yoshe!
24Vikajo unatukengesela nima?
Kesi wivale tuyando na mapakeso etu!
25Vatusindakanena asi vanatufungulula,
nakumbashamena asi.
26Katuka utukwase!
Twamene, omwo cizemo cove
cije kucesi kutenguluka!
The Bible in Mbunda ©The Bible Society of Zambia, 2006