Myaso 4
4
Lilombelo lya cingwezi lyakukwasa
Mwaso wa Ndaviti
1Omo njitambeka njikumbulule,
yove Njambi, muka-kunjamena!
Omo njakele mu vukalu,
yove wanjamenene,
njizivileko mema ku mbunge,
co ziva lilombelo lyange!
2Yeni vanu visimbu vingai mukanjishaula?
Visimbu vingai mukazema
vije vinapu vyangoco,
nakukavangeya vije vinapu vya makuli?
3Anukeni ngeci Shukulu Kalunga
nalyangwila vaka-vushunga kupwa vendi,
co alinakunjiziva omo njitambeka kuli ikeye.
4 #
Efe 4:26
Kuluvala kweni, kesi kumitwamenene ku vuvi,
omo mulala a malili eni,
yongoleni a majwi awa.
5Kombeleleni vin̄ombelo vya vushunga kuli Shukulu Kalunga,
co kulaeleni muli ikeye.
6Omo kuvali vavangi valinakulombela ngwavo,
“Twane vivezikiso Shukulu Kalunga!
Tuzivileko mema ku mbunge!”
7Oloni kuvwaelela oku kuunanjana
kunapu kwakama manene,
kunatuvakana kuvwaelela kwa vaje
vali na vimbuto vyavingi
na vinyu vyavo vyavingi vyaviha.
8Omo njilala, co njiya mu tulo ngwe muje mwalalele
mbuli mutenga,
yove lika Shukulu Kalunga,
u muka-kunjinyunga mwamuvwa.
The Bible in Mbunda ©The Bible Society of Zambia, 2006