Myaso 5
5
Lilombelo lyakunyunga
Mwaso wa Ndaviti
1Tolilila ku majwi ange yove Shukulu Kalunga,
ziva kukulinyenga kwange.
2Zivilila ku mutambi wange,
mwene yange na Njambi yange.
Njilomba kuli yove Shukulu Kalunga.
3Yove Shukulu Kalunga
ukazivi lijwi lyange ku mutondo,
co akutuuka kwa litangwa
njikakombelela n̄ombelo,
nakuvandamena kukumbulula kwove.
4Omwo yove kesi u Njambi uje akavwaelela na vuvi,
yove kuwesi kutava vuvi vwete ku mesho ove.
5Vaka-kulyalesa kuvakemana ku mesho ove,
yove wazinda voshe vaka-kulinga vuvi.
6Yove Shukulu Kalunga unyongesa voshe vaka-makuli,
nakuzinda vaka-kutsiya na vaka-kukwisa.
7Oloni omwo a cizemo cove cakama
cije kucesi kutenguluka,
njikakovela mu Njuvo yove,
co njikalemesa mu Njuvo yove yakujela.
8Shukulu Kalunga, njitwamenene mu vushunga vwove,
omwo ya vitozi vange,
njishungamesele ngila yove ngeci njiikavangeye!
9 #
Lom 3:13
Vitozi vange kuvesi kwendeka vushunga,
mukuyoya kwavo kwoshe
vashakezeka lika kunyongesa vanu,
vimbunge vyavo vinashulu na makuli,
co vakaseveleka vanu na majwi a vungumba.
10Vanyanyamese nakuvahisa yove Njambi,
matumbe avo avanyongese vakevo vavenya.
Vashekele kulyala nove omwo kutuma kwa vuvi vwavo,
omwo vanakutengulukila nakukulwisa.
11Oloni voshe vaje vatewela muli yove vakajolela,
simbu yoshe vakaimba nakujolela.
Nyunga vaje vakuzema,
omwo ali yove vakavwaelela.
12Yove Shukulu Kalunga,
ukavezikisa vaje vakwononoka,
cizemo cove cikavanyungu ngwe ntelo.
The Bible in Mbunda ©The Bible Society of Zambia, 2006