Myaso 36
36
Vuvi vwa munu
Mwaso wa Ndaviti ngamba ya Shukulu Kalunga
1 #
Lom 3:18
Vuvi vukalingisa vaka-vuvi
ngeci vakavangeye viyongola vyavivi
vili mu vimbunge vyavo,
vakavyana Njambi, co kuvesi kumukomoka.
2Omwo valyalesa nakuyongola ngwavo
Njambi kasa kumona vuvi vwavo nakuvahisilavwo.
3Majwi avendeka anashulu na muuka na makuli,
vanaseza vilinga vya mana na vilinga vyavivwa.
4Vakatumbu matumbe amavi oku vanalala a vulili vwavo,
nacimo cacivwa civakalingi cai,
co kuvesi kuvyana cuma cacivi.
Vuvwa vwa Njambi
5Shukulu Kalunga,
cizemo cove cije kucesi kutenguluka
cinete na mu melu,
kulongwa kwove kunete ku mashelwa.
6Vushunga vwove vunapu ngwe minkinda yakama,
kusompa kwove kwalova manene ngwe mema a kalunga.
Yove Shukulu Kalunga wanyunga vanu na tusitu.
7Mucavwaa cizemo cove Njambi,
cizemo cije kucesi kutenguluka!
Vanu valinakuvanda mu munzinze wa mambava ove.
8Vakevo vakuta manene na vyakulya vyavingi vyakutunda kuli yove,
yove ukavana vyuma vyavivwa vije viketi ngwe mema a mu ndonga.
9Yove ukaana mwonyo ku vyuma vyoshe.
Omo a ceke cove twasa kumona ceke.
10Zema vaje vakuzivuka,
co linga vuvwa kuli vaje vaka-vushunga,
11kesi utave vaka-kulyalesa vanjilwise,
nambe vaka-vuvi vanjisheke.
12Kenga, vaka-vuvi vanau!
Vanawila asi, co kuvasa kwinduka.
The Bible in Mbunda ©The Bible Society of Zambia, 2006