Myaso 35
35
Lilombelo lyakukwasa
Mwaso wa Ndaviti
1Shukulu Kalunga, yeluwisa vaje vanjiyeluwisa,
co lwa na vaje vanjilwisa!
2Ambata ntelo yakama neyi yaindondo,
co katuka unjikwase.
3Jundula likunga lyove na njaviti yove
ali vaje vanjikavangeya.
Njikulaese ngeci ukanjamena!
4Voshe vaje vashaka kunjitsiya,
vavafungulule nakuziva shwamwa!
Voshe vaje vanjitumbila vutumbe
vwakunjilwisa velwise munima nakuvaiya-iyisa!
5Vapwe ngwe lijungu lyakupekumuka na lihunzi,
omo kangelo ka Shukulu Kalunga avasheka!
6Vingila vyavo vipwe vya lisusulungu nakuseneta,
omo kangelo ka Shukulu Kalunga avapupa nakuvawisila asi!
7Vananjitela mweto kwakujeneka mulonga,
co vananjiindila mbulu yakulova ngeci vanjikwate.
8Oloni vakanyonga vwasi-vwasi,
co vakatsa mu linimbwa lyavo vavenya!
Vakawila mu mbulu nakunyonga!
9Asinoni njikajolela muli Shukulu Kalunga,
co njikavwaelela omwo nanjamena.
10Njikendeka kuli Shukulu Kalunga
na mbunge yange yoshe ngwange,
“Kukwesi umo wakulifwa nove!
Yove ukanyungu vaka-kuzeya kuli vaka-nzili,
ukanyungu kautu kuli muka-kumuyandesa!”
11Vakaleo va makuli vanjivangeya
milonga ije kunjizivuka.
12Vanjiilwisila vuvi ku vuvwa vunjinalingi,
co njiliziva vulika.
13Oloni omo vakele nakuvinja,
njazalele cikeleya,
co njalikeesele nakulikela kulya,
njalombelele nakulikulamena,
14njakele na vusiwa ngwe vusiwa
vwa ali musamba wange
nambe ngwe vusiwa vwa ali ndolome yange,
ngwe munu uje alinakulila vaina.
15Oloni omo njakele mu tuyando,
voshe vavwaelelele,
co valikungulwile nakunjishendumuna,
vangenzi vanjipupangele,
co vatwaleleo vene kunjipupanga,
16ngwe vanu vaje vashendumuna cilema,
co vanjikengele na vukalu.
17Visimbu vingaijo ukakengao yove Shukulu Kalunga?
Njovole kukunjilwisa kwavo,
njamene ku vitozi vange vaje vanjilwisa ngwe vindumba!
18Asinoni njikakukandelela ku mbunga ya vanu vove,
co njikakushangazala ku mesho avo voshe.
19 #
Mya 69:4; Yow 15:25 Kesi utave vitozi vange vanjijole omwo kashwilo kai,
kesi utave vaje vananjizindi ngoco
valinyateye na mesho.
20Kuvesi kwendeka majwi amavwa embwe,
oloni vakendeka makuli ku vanu vaje
valinakuyoya mu lifuti mu kwoloka.
21Vitozi vange vananjivangeya,
nakunjiyeluwisa ngwavo,
“Twamwene vije viwalingile!”
22Oloni yove Shukulu Kalunga wapwa u mukaleo,
co kesi woloke kuluu.
Kesi ukale kulyala nange yove Shukulu Kalunga!
23Induka ngeci unjamene yove Shukulu Kalunga!
Katuka, Njambi yange,
co njisompele n̄anda yange ipwe ya vushunga.
24Yove Shukulu Kalunga Njambi yange,
njisompe ngwe ku vushunga vwove,
co kesi utave vitozi vavwaelele ali yange!
25Kesi utave valyendekese vakevo vavenya ngwavo,
“Eyo, tunamuwana!
Mukemwo vene mutwashakele muje.”
26Voshe vaje vavwaelela a tuyando twange,
vavafungulule nakuvatanganesa,
voshe vaje valitumbula kupwa vavavwa kutuvakana yange,
vazive shwamwa nakushauka!
27Vaje vashaka kumona kusamba kwange
vatambeke nakujolela nakwendeka ngwavo,
“Shukulu Kalunga wapwa wakama!
Ikeye avwaelela akuvezika kwa ngamba yendi!”
28Asinoni njikambulula vushunga vwove,
co njikakushangazala litangwa lyoshe.
The Bible in Mbunda ©The Bible Society of Zambia, 2006