Myaso 37
37
Vije vikasholoka ali muka-vuvi na muka-vuvwa
Mwaso wa Ndaviti
1Kesi ulishoshomwene ali vaka-kulinga vuvi,
nambe kuliveyela vaje valinga vya kupenga-penga.
2Vakevo vakahwa ngwe mwila wakuma,
vakajujwama ngwe maputa akutonola.
3Kulaela kuli Shukulu Kalunga,
co linga mwamuvwa,
kala mu lifuti, co yoya mwamuvwa.
4Vwaelela muli Shukulu Kalunga,
co akakwana vije viwushaka.
5Kundika ngila yove kuli Shukulu Kalunga,
kulaela kuli ikeye, co akakukwasa,
6akavyazimisa vushunga vwove
ngwe litanya lya akati ka mutwe.
7Simpa nakuvandamena Shukulu Kalunga
ngeci apange,
kesi ushote mbunge ali vaje vanafuku,
nambe vaje valinakuya kulutwe a matumbe avo a vuvi.
8Kesi ushote mbunge nambe kuluvala!
Citwala lika ku tuyando.
9Vaje vakulaela kuli Shukulu Kalunga,
vakashwana mu lifuti,
oloni vaka-vuvi vakavashekela anja.
10Mu kasimbu kakandondo lika,
vaka-vuvi vakahwa voshe njwa,
ukavashakezeka, oloni kuukavawana.
11 #
Mat 5:5
Vaka-kulikeesa vakashwana mu lifuti,
co vakajolela nakukala mu kwoloka.
12Muka-vuvi atumbila vutumbe muka-vushunga,
co amukenga na vukalu.
13Oloni Shukulu Kalunga akajolo vaka-vuvi,
omwo nazivuka ngeci kasimbu kakandondo lika
vakanyonga.
14Vaka-vuvi vashomona mikwale yavo,
co vanana mata avo a lusipa,
nakutsiya kautu na muka-kujeneka,
nakutsiya vaje valinga vyavivwa,
15oloni vakatsa ku mikwale yavo vavenya,
co mata avo a lusipa akapokozoka.
16Cuma cacindondo calinaco muka-vushunga
cinatuvakana vufuko vwoshe vwa vaka-vuvi.
17Shukulu Kalunga akatundisa nzili ya vaka-vuvi,
oloni akanyunga vaje vanapu vavavwa.
18Shukulu Kalunga akanyungu vaje vamwononoka,
co lifuti likapwa lyavo ku myaka yoshe.
19Vakevo kuvakayanda a simbu ya vukalu,
co vakakala na vyakulya vyavingi
a simbu ya njala ya lyangengela.
20Oloni vaka-vuvi vakanyonga,
co lalo vitozi va Shukulu Kalunga
vakaziluka ngwe vishani,
vakahwa ngwe vwisi,
co kuvakavamono lalo embwe.
21Munu muka-vuvi akakumuna,
oloni kesi kwilwisa,
oloni munu wamuvwa wakala na ngozi
nakwana vwana vwendi.
22Vaje vanavezikisa Shukulu Kalunga
vakashwana mu lifuti,
oloni vaje vanasingi akavashekela anja.
23Shukulu Kalunga akatwamenena munu
mu ngila ije yanapande kwendelamo,
co akanyungu vaje vamuvwasa.
24Nga vawa, kakavecelela vakale asi embwe,
omwo Shukulu Kalunga akavakwata na livoko lyendi.
25Njapwile nji mukwenje,
ololo njinakuluvala,
kanda njimone Shukulu Kalunga kwivala muka-vushunga,
nambe vana vendi kulomba vyakulya.
26Visimbu vyoshe akana vwana
nakukumwisa ku vakwavo,
co vana vendi vavezika.
27Tundeni ku vuvi ngeci mulinge vushunga,
co vatekulwila veni vakayoya mu lifuti myaka yoshe.
28Omwo Shukulu Kalunga wazema vije vyavivwa,
ikeye kesi kuseza vanu vendi vaje vamukulaela,
co ikeye akavanyunga simbu yoshe,
oloni vatekulwila va vaka-vuvi vakavashekela anja.
29Vaka-vushunga vakakala mu lifuti,
co vakayoyelamo ku myaka yoshe.
30Majwi a munu wamuvwa apwa a mana,
co ikeye akendeka vushunga simbu yoshe.
31Ikeye akanyungu lishiko lya Njambi yendi
mu mbunge yendi, co kesi kuliseza.
32Munu muka-vuvi simbu yoshe
akakenge ali munu wamuvwa nakushaka kumutsiya,
33oloni Shukulu Kalunga kakamwecelela
ku mavoko a vitozi vendi,
nambe kutava ngeci vamuhise omo vamusompesa.
34Aka cinyangavili cove muli Shukulu Kalunga
ononoka mashiko endi,
akakusingimika nakukwana lifuti,
co ukamona vaka-vuvi vavashekamo.
35Njamwene muka-vuvi uje wakele na vukalu,
ikeye wahyanene munu woshe
ngwe muti wa kendale wa ku Lembanone.
36Oloni omo njetile kuje kunjamuwaneneko,
njamukengezekele, oloni kunjamuwanene.
37Kenga ali muka- mulonga,
na ali muka-vushunga,
munu wa kwoloka wakala na vatekulwila vavangi,
38oloni vaka-vuvi vakavanyongesa voshe njwa,
na vatekulwila vavo vakavanyongesa.
39Kwamena kwa vaka-vushunga kutunda kuli Shukulu Kalunga.
Ikeye vutewelo vwavo a simbu ya tuyando.
40Shukulu Kalunga avakwasa nakuvamena,
ikeye avamena ku vaka-vuvi,
omwo vatewela kuli ikeye ngeci avanyunge.
The Bible in Mbunda ©The Bible Society of Zambia, 2006