Myaso 34
34
Kushangazala vuvwa vwa Njambi
Mwaso wa Ndaviti, omo walikwisile kuzaluka kuli Avimeleke uje wamushekele, co waile (1 Sam 21:13-15)
1Simbu yoshe njikakandelela Shukulu Kalunga,
kunjikalikela kumushangazala.
2Njikamushangazala a vije vyanalingi,
voshe vaje vaka-kulikeesa vazive nakujolela!
3Tsimaneseni vukama vwa Shukulu Kalunga amo nange,
tushangazaleni lizina lyendi!
4Njalombelele kuli Shukulu Kalunga,
co wanjikumbulwile,
ikeye wanjipatwile ku lyova lyange lyoshe.
5Vaka-kuyanda vakenga kuli ikeye,
co vajolela, kuvakazivi shwamwa.
6Tuutu vakatambeka kuli ikeye,
co akavaziva,
ikeye akavamena ku tuyando twavo twoshe.
7Kangelo ka Shukulu Kalunga akanyungu
vaje vakomoka Shukulu Kalunga,
nakuvapatula ku vushonde.
8 #
1 Pet 2:3
Kengeni mumone ngeci Shukulu Kalunga
wapwa wamuvwa!
Navezika munu uje atewela muli ikeye.
9Yeni vanu vendi vakujela komokeni Shukulu Kalunga,
vaje vamukomoka kuvakajeneka cuma nacimo cai.
10Vana va vindumba vajeneka vyakulya,
co vaziva njala,
oloni vaje valemesa Shukulu Kalunga
kuvakajeneka cuma cacivwa nacimo cai.
11Ijeni vana vange, njitolilileni,
co njikamilongesa kukomoka Shukulu Kalunga.
12Munu iyajo uje ashaka mwonyo?
Munu uje ashaka kuyoya matangwa
amangi ngeci amone vyavivwa?
13Munu wa cifwa cangacije kesi endeke vyavivi
nambe kwendeka makuli.
14Atunde ku vuvi nakulinga vyuma vyavivwa,
ashakezeke nakukavangeya kwoloka.
15Shukulu Kalunga akenga ali vaka-vushunga,
co aziva mutambi wavo,
16 #
1 Pet 3:10-12
oloni ikeye akayeluwisa vaje vaka-kulinga vuvi,
co vavevala vwasi omo vatsa.
17Omo vaka-vushunga vatambeka,
co Shukulu Kalunga avaziva,
avamena ku tuyando twavo twoshe.
18Shukulu Kalunga ali muyehi
na vaje vanazeye mu vimbunge,
ikeye amena vaje vanajeneka cinyangavili.
19Tuyando twa muka-vushunga twapwa twatungi,
oloni Shukulu Kalunga amwamena mu vyoshe.
20 #
Yow 19:36
Shukulu Kalunga anyunga vitsiya vyendi vyoshe,
nacimo cai cipokokako.
21Vuvi vuvulumuna vaje vaka-kuvulinga.
Voshe vaje vazinda vaka-vushunga vakavahisa.
22Shukulu Kalunga amena myonyo ya vangamba vendi,
naumo wai atewela muli ikeye vakamuhise.
The Bible in Mbunda ©The Bible Society of Zambia, 2006