Myaso 31
31
Lilombelo lyakukulaela kuli Njambi
Mwaso wa Ndaviti
1Muli yove Shukulu Kalunga mukemwo munjiwana kuvanda,
shwamwa kesi injikole,
yove unapu Njambi wa vushunga,
njilinakulomba ngeci unjamene!
2Tolilila ku kulomba kwange,
co njikumbulule vwasi!
Pwa limanya lyange lya vutewelo,
cimpaka cange cakunjamena.
3Yove limanya lyange na cimpaka cange,
omwo lizina lyove,
njitwamenene nakunjimwesa ngila.
4Njinyunge mwamuvwa ku mweto uje vananjitela,
omwo yove unapu u cimpaka cange.
5 #
Luk 23:46
Mu mavoko ove njikundika mwonyo wange,
yove Shukulu Kalunga Njambi wa vushunga,
yove unanjikulu.
6Njazinda vaje vakalemesa vinjambi vyangoco,
oloni yange njinakulaela kuli yove.
7Njikavwaelela nakujolela,
omwo cizemo cove cije kucesi kutenguluka.
Unamono tuyando twange,
yove uzivuka n̄avava yange.
8Kuwatavele ngeci vitozi vange vanjifungulule,
yove wanjitavesa kuya kwoshe kunjishaka.
9Njizivileko mema ku mbunge yove Shukulu Kalunga,
omwo njili mu tuyando,
mesho ange anazimbi omwo kulila manene,
mwa vushunga njinazeye manene!
10Mwonyo wange unazeye omwo vusiwa,
na myaka yange inapu ya tuyando,
nzili yange inahu omwo vuvi vwange,
co vitsiya vyange vinazeye.
11Vitozi vange voshe
vunene vene vandambo vaje vanjinalyata navo,
na voshe vaje vanjizivuka valinakunjitewa,
omo vanjiwana mu ngila, co vatewa.
12Voshe vananjivala,
ngwe munu uje watsa laja,
yange njinalifu ngwe citambi
ca ndeo civanombila kuti.
13Njinazivi vitozi vavangi valinakuyeveta,
co vyakujujwisa vyoshe vinanjizengeleka!
Valinakutumba matumbe akunjitsiya.
14Oloni njakulaela kuli yove Shukulu Kalunga,
njendeka ngwange, “Yove u Njambi yange.”
15Mwonyo wange woshe uli mu mavoko ove,
njamene ku vitozi vange,
na kuli voshe vaje vanjiyandesa.
16Yange njinapu nji ngamba yove,
kenga ali yange na ngozi,
njamene na cizemo cove cije kucesi kutenguluka!
17Shukulu Kalunga, shwamwa kesi injikole,
omwo njilombela kuli yove,
shwamwa ikole vaka-vuvi.
Vanapande kwoloka kuluu mu vukalo vwa vatsi.
18Olwesa vaje vaka-makuli,
na voshe vaka-kulyalesa na vaka-kulindula,
vaje vendeka na kayengu kuli vaka-vushunga!
19Mwa vushunga ngozi yove yakama,
ije iwunatulikila vaje vakukomoka,
ije iwunapangela vaje vavanda muli yove,
ku mesho a vana va vanu!
20Uvashweka nakuvanyunga mwamuvwa kuli yove,
nakuvatundisa ku matumbe a vanu,
co uvashweka mu cimpaka cacivwa,
nakuvatundisa ku kashaundu ka vitozi vavo.
21Shangazaleni Shukulu Kalunga!
Omo wanjimwesele cizemo cendi cakukomokesa
cije kucesi kutenguluka omo vanjizengelekele nakunjilwisa!
22Njazivile lyova nakuyongola ngwange
amo Shukulu Kalunga nanjumbila kuti.
Oloni ikeye wazivile kulomba kwange,
omo njatambekele ngeci anjikwase.
23Zemeni Shukulu Kalunga yeni voshe vanu vendi vakujela.
Shukulu Kalunga anyunga vaka-kulongwa,
oloni ahisa vaka-kulyalesa ngwe ku vilinga vyavo.
24Yeni voshe muli na cinyangavili muli Shukulu Kalunga
koleseni nakusimpa.
The Bible in Mbunda ©The Bible Society of Zambia, 2006