Myaso 30
30
Lilombelo lya cikandelela
Mwaso wa Ndaviti wakukundika Njuvo ya Shukulu Kalunga
1Njikushangazala yove Shukulu Kalunga,
omwo unanjamena,
co kuwakengelelele vitozi vange
ngeci valyalesele ali yange embwe.
2Yove Shukulu Kalunga Njambi yange,
njalombelele kuli yove ngeci unjikwase,
co yove wanjikangwisile.
3Yove Shukulu Kalunga
wanjitundisile mu vukalo vwa vatsi,
unanjiyoyesa ngeci kesi njitse.
4Yeni vanu vendi vakujela,
imbeni nakushangazala Shukulu Kalunga!
Anukeni vije vyanalingi uje Wakujela,
co kandeleleni.
5Omwo kuluvala kwendi kwa kasimbu lika,
oloni vuvwa vwendi vwapwa vwa simbu yoshe.
Kulila kukakalako a simbu ya vutsiki,
oloni kujolela kukakalako ku mutondo.
6Omo njakele na vufuko
njalyendekesele yange vavenya ngwange,
“Kuvakanjifungulula.”
7Yove Shukulu Kalunga wapwile wamuvwa kuli yange,
wanjinyungile mwamuvwa
ngwe munkinda wa cimpaka.
Oloni omo wanjikengesele nima,
co njazivile manene lyova.
8Njatambekele kuli yove Shukulu Kalunga,
co njakulombele ngeci unjikwase.
9Vikajo uwanao a kutsa kwange?
Seo mukajo ukawanao nga njitsa?
Kuma vatsi vasa kukushangazala ndi?
Kuma vasa kwambulula vya kulongwa kwove
kukwesi kuhwa ndi?
10Yove Shukulu Kalunga njitolilile,
nakunjizivilako mema ku mbunge!
Pwa mukwasi wange!
11Unatengulula vusiwa vwange kuvupwisa kujolela,
unatundisa vusiwa vwange nakunjana kujolela.
12Ngecivene, kunjikoloka kuluu embwe,
njikaimba nakukushangazala.
Shukulu Kalunga, yove u Njambi yange.
Njikakukandelela ku myaka yoshe.
The Bible in Mbunda ©The Bible Society of Zambia, 2006