Myaso 27
27
Lilombelo lyakushangazala
Mwaso wa Ndaviti
1Shukulu Kalunga ikeye ceke cange na muyoyesi wange,
kunjikazivi lyova.
Shukulu Kalunga ikeye muka-kunjamena ku vushonde vwoshe,
kunjikatewe embwe.
2Omo vaka-vuvi vaija kuli yange nakunjilwisa,
co vatanuka nakuwa.
3Nameme nga mashwalale voshe vanjizengeleka,
kunjizivi lyova embwe,
nameme nga vitozi vanjilwisa,
anga njikakulaela Njambi.
4Njehwile Shukulu Kalunga cuma cimolika,
cuma cimolika cinjishaka,
kukala mu Njuvo ya Shukulu Kalunga
simbu yoshe ya mwonyo wange,
ngeci njimone vuvwa vwendi,
nakumulomba ngeci anjitwamenene.
5A simbu ya tuyando akanjishweka mu cimpaka cendi,
co akanjinyunga mwamuvwa mu Njuvo yendi,
co akanjitumbika a limanya lyalilaja.#27:5 LIMANYA LYALILAJA: Kenga 18:2.
6Ngecivene, njikafungulula vitozi vange vaje vananjizengeleka,
co njikakombelela vin̄ombelo nakujolela mu Njuvo yendi,
njikaimba, nakushangazala Shukulu Kalunga!
7Njitolilile omo njilombela kuli yove Shukulu Kalunga!
Njizivileko mema ku mbunge ngeci unjikumbulule!
8Omo wendekele ngwove, “Ija unjilemese,”
co njakumbulwile ngwange,
“Njiija, Shukulu Kalunga,
9kesi unjikengese nima!”
Kesi uluvale nange,
kesi ushekele ngamba yove kulyala.
Yove mukwasi wange,
kesi unjiseze,
nambe kunjikengesa nima,
Njambi yange, muyoyesi wange!
10Vatate na vanana vasa kunjumbila,
oloni Shukulu Kalunga akanjinyunga.
11Shukulu Kalunga njilongese vije viwushaka ngeci njivilinge,
co njitwamenene mu ngila yakujeneka vushonde,
omwo njili na vitozi vavangi.
12Kesi unjikundike ku vitozi vange vaje valinakunjilwisa
na makuli nakunjijujwisa.
13Njazivuka ngeci njikamona vuvwa vwa Shukulu Kalunga
mu lifuti lya vaka-kuyoya.
14Kulaela kuli Shukulu Kalunga,
kulaela, kesi uzeye.
Kulaela kuli Shukulu Kalunga.
The Bible in Mbunda ©The Bible Society of Zambia, 2006