Myaso 26
26
Lilombelo lya munu wa vushunga
Mwaso wa Ndaviti
1Yove Shukulu Kalunga,
njakwile mu vushunga akujeneka mulonga,
omwo njikalingi vya vushunga,
nakukukulaela na mbunge yange yoshe.
2Njiilule nakunjeseka yove Shukulu Kalunga.
Eseka mbunge yange na viyongola vyange.
3Cizemo cove cije kucesi kutenguluka cinjitwamenene,
na kulongwa kwove kunjitwamenene simbu yoshe.
4Kunjesi kukala amo na vanu vaka-makuli,
nambe kusimutwiya na vaka-civembulu.
5Yange njazinda munga ya vanu vaka-vuvi,
co kunjesi kukala amo na vaka-vuvi.
6Shukulu Kalunga, njijwela ku mavoko ange
kumwesa ngeci kunjesi na mulonga,
co njiya nakulemesa ku mutula wove.
7Njikaimba mwaso wa cikandelela,
nakwambulula vilinga vyove vyakukomokesa.
8Njizema Njuvo yove muje muwakala yove Shukulu Kalunga,
mu mwela muje mwakala vumpau vwove.
9Kesi unjinyongesele kumo na vaka-vuvi embwe,
njitundise kuli vaka-kutsiya,
10vanu vaka-kulinga vuvi simbu yoshe,
vakana lizika-kanwa.
11Oloni yange njikalingi vya vushunga,
njizivileko mema ku mbunge, co njamene.
12Yange njinovoka ku vushonde vwoshe,
njikashangazala Shukulu Kalunga
mu mbunga yakama!
The Bible in Mbunda ©The Bible Society of Zambia, 2006