Myaso 25
25
Lilombelo lyakutwamenena nakunyunga
Mwaso wa Ndaviti
1Kuli yove Shukulu Kalunga njikundika mwonyo wange.
2Muli yove Njambi yange njinakulaela.
Shwamwa kesi injikole,
vitozi vange kesi vanjifungulule!
3Mwa vushunga naumo wai akulaela kuli yove
akaziva shwamwa,
shwamwa ikola vaka-vungungu omwo kashwilo kai.
4Njilongese vingila vyove yove Shukulu Kalunga,
ngeci njivizivuke.
5Njitwamenene mu vushunga vwove nakunjilongesa,
omwo yove wapwa u Njambi yange muka-kunjamena.
Kuli yove lika njinakulaela matangwa oshe.
6Anuka kutetela kwove yove Shukulu Kalunga,
na cizemo cove cije kucesi kutenguluka,
vije viwasholwele tunde ku san̄ulu.
7Njisambese ku vivi vyange
na ku milonga ya a vukwenje vwange.
Njanuke, Shukulu Kalunga!
Omo cizemo cove cije kucesi kutenguluka
na vuvwa vwove!
8Omwo Shukulu Kalunga wapwa wa vushunga na vuvwa,
akalongesa vaka-vuvi ngila ivanapande kwendelamo.
9Ikeye akatwamenena muka-kulikeesa
mu ngila yaivwa nakumulongesa cizango cendi.
10Akatwamenena na cizemo cendi cije kucesi kutenguluka
na vushunga vwendi,
voshe vaje vanyunga cikumiiyo cendi,
nakwononoka mashiko endi.
11Omwo a lizina lyove yove Shukulu Kalunga,
njisambese ku vuvi vwange,
omwo vwavungi manene.
12Vaje vakomoka Shukulu Kalunga
vakavalongesa ngila ije ivanapande kwendelamo.
13Simbu yoshe vakakala mwamuvwa,
co vana vavo vakashwana mu lifuti.
14Shukulu Kalunga wapwa musamba wa vaje vamwononoka,
co akakolesa cikumiiyo cendi navo.
15Mesho ange simbu yoshe akakenge kuli Shukulu Kalunga
ngeci anjikwase, co anjamena ku vushonde.
16Tengulukila kuli yange yove Shukulu Kalunga,
nakunjizivilako mema ku mbunge,
omwo njili ange lika, co njinazeye.
17Njitundise cishota-mbunge,
nakunjamena ku tuyando twange twoshe.
18Yongola tuyando twange na n̄avava yange,
co njisambese ku vuvi vwange vwoshe.
19Yongola vitozi vange vanatumu,
co vananjizindi manene!
20Njinyunge nakunjamena,
njinyunge kuli vaka-kunjifungulula.
Njiija kuli yove ngeci unjinyunge.
21Vuvwa vwange na kasingimiko kange vinjinyunge,
omwo njinakulaela kuli yove.
22Yove Njambi, amena Isalele ku tuyando twendi twoshe!
The Bible in Mbunda ©The Bible Society of Zambia, 2006