Myaso 24
24
Mwene wakama
Mwaso wa Ndaviti
1 #
1 Koli 10:26
Kaye na vyoshe vije vilimo vyapwa vya Shukulu Kalunga,
asi na vanu voshe valiho vapwa vendi.
2Ikeye watungilile kaye a mema akulova mwisi ya livu,
co wajalele luvula lwako a mema a kalunga akulova.
3Veyajo vakalamata ku lilundu lya
Shukulu Kalunga?#24:3 LILUNDU LYA SHUKULU KALUNGA: Lilundu lya mu Yelusalema aje avatungilile Njuvo ya Shukulu Kalunga.
Veyajo vanapande kwimana mu Njuvo yendi yakujela?
4 #
Mat 5:8
Kuvanga vaje vanajele mu vimbunge,
nakulinga vipangi vyavivwa,
vaje kuvesi kulemesa tumponya,
nambe kulinga mazivasano a makuli.
5Shukulu Kalunga akavavezikisa nakuvamena,
Njambi akavapwisa vaka-kujeneka mulonga.
6Vanu va cifwa cangacije
vakevo vakashakezeka Shukulu Kalunga,
vakevo vakashakezeka cihanga ca Njambi ya Yakomba.
7Anjununeni vikolo,
shokololeni mapito a ku myaka yoshe,
Mwene wa vumpau akovelemo!
8Iyajo ou Mwene wa vumpau?
Ikeye Shukulu Kalunga Muka-nzili yakuhyana,
Mwene muka-kuhyana mu vinzita!
9Anjununeni vikolo,
shokololeni mapito a ku myaka yoshe,
Mwene wa vumpau akovelemo!
10Iyajo ou Mwene wa vumpau?
Shukulu Kalunga Muka-nzili yakuhyana,
ikeye Mwene wa vumpau!
The Bible in Mbunda ©The Bible Society of Zambia, 2006