Myaso 19
19
Vumpau vwa Njambi mukutanga
Mwaso wa Ndaviti
1Melu ambulula vumpau vwa Njambi!
Kaye kasholola vipangi vya mavoko endi!
2Litangwa na litangwa vanu vamona vumpau vwa Njambi,
vutsiki na vutsiki vasa kumona vukama vwa Njambi.
3Kuvesi kwendeka majwi ngwe muvakendeka vanu,
4 #
Lom 10:18
oloni vivakendeka vaviziva kwoshe-ikwoshe,
kuje kwakala vanu ano asi.
Njambi navwaesela litangwa mwela mwilu,
5omo litangwa lituuka mutondo linapu ngwe shombolwa,
uje atuuka mu njuvo yendi,
linapu lalo ngwe muka-kushatuka,
uje ali na cizango cakuhyana.
6Likelyo lituukila ku shongo imo ya lilu,
nakulaukila ku shongo ikwavo ya lilu,
cuma nacimo cai casa kuvanda ku ntwima yalyo.
Mashiko a Shukulu Kalunga
7Mashiko a Shukulu Kalunga apwa akulumbunuka,
akewo akolesa mwonyo.
Mashiko a Shukulu Kalunga apwa amavwa kuwakulaela,
aana mana kuli vaje vanawajeneka.
8Mashiko a Shukulu Kalunga apwa a vushunga,
voshe vaje vawononoka vavwaelela.
Mashiko a Shukulu Kalunga apwa akujela,
aana munu mana akuzivisisa.
9Kukomoka Shukulu Kalunga kunapu kwakuvwa
ku myaka yoshe,
mashiko a Shukulu Kalunga simbu yoshe apwa a vushunga.
10Apwa amavwa manene,
anatuvakana ngolinde yaivwa manene,
nakutuvakana lalo vuki vwa mwenga.
11Akewo anjinangula yange ngamba yove,
njinatambula cikandelela akuwononoka.
12Naumo wai asa kumona milonga yendi vavenya,
njisambese Shukulu Kalunga
ku milonga ya kushweka!
13Njinyunge mwamuvwa ku vuvi vwa cizango,
kesi utave vunjishwane.
Ngecivene, njikapwe wakulumbunuka nakupatuka ku vuvi.
14Majwi ange na viyongola vyange,
vipwe vyavivwa ku mesho ove Shukulu Kalunga,
limanya lyange na numbi yange ya lukule milonga!
The Bible in Mbunda ©The Bible Society of Zambia, 2006