Myaso 20
20
Lilombelo lyakuhyana
Mwaso wa Ndaviti
1Shukulu Kalunga akukumbulule omo uli mu vukalu!
Njambi ya Yakomba akunyunge!
2Akutumise vukwasi vwakutunda ku Njuvo yendi yakujela,
nakukwana vukwasi vwakutunda ku Munkinda wa Siyone!
3Ikeye atambule vin̄ombelo vyove vyoshe,
co avwaelele na vin̄ombelo vyove vya kwenyeka.
4Ikeye akwane vyoshe viwushaka,
co mu lizina lya Njambi,
matumbe ove oshe aye kulutwe.
5Asinoni tukatambeka nakujolela
akuhyana kwove,
co mu lizina lya Njambi yetu
tukashimbika vipandelo
vyakushangazala Njambi yetu.
Shukulu Kalunga akumbulule kulomba kwove kwoshe!
6Ololo njazivuka ngeci Shukulu Kalunga
akahyanesa mwene uje yanavwavesa,
ikeye akamukumbulula kutunda mwilu
muje mwakujela,
co a nzili yendi yakama
ya livoko lyendi lya cilyo akamuhyanesa.
7Vamo vanakulaela mu matemba avo a nzita,
co vakwavo lalo vanakulaela ku tuvalu twavo,
oloni yetu tunakulaela nzili ya Shukulu Kalunga
Njambi yetu!
8Vanu vangacije vakatanuka nakuwila asi,
oloni yetu tukenduka nakwimana mbe!
9Yove Shukulu Kalunga ana kuhyana kuli mwene,
tukumbulule omo tutambeka.
The Bible in Mbunda ©The Bible Society of Zambia, 2006