Myaso 18
18
Mwaso wa Ndaviti wakuhyana
(2 Sam 22:1-51)
Awa akewo majwi a Ndaviti, ngamba ya Shukulu Kalunga, mwaso wembilile Shukulu Kalunga a litangwa lije lyamwamenene ku livoko lya Saulu na ku vitozi veka lalo.
1Njikushangazala yove Shukulu Kalunga!
Yove muka-kunjamena ku vushonde.
2Shukulu Kalunga ikeye muka-kunjinyunga,
ikeye wapwa cimpaka cange cakukola.
Njambi yange ikeye wapwa cishwamo cange,
muli ikeye mukemwo munjitewela.
Ikeye wapwa ntelo yange,
muka-kunjamena nakunjinyunga mwamuvwa.
3Njitambeka kuli Shukulu Kalunga,
co ikeye anjamena ku vitozi vange.
Shangazaleni Shukulu Kalunga!
4Kutsa kwanjizengelekele ngwe linimbwa,
mankimba akunjinyongesa anjifwikile.
5Kutsa kwanjizengelekele ngwe linimbwa,
co vinganjo vya mbumbo vyanjishwikile.
6Mu simbu yange ya tuyando,
njatambekele kuli Shukulu Kalunga,
njatambekele kuli Njambi yange ngeci anjikwase.
Mu Njuvo yendi wazivile lijwi lyange,
ikeye watolililile ku mutambi wange wa akukwasa.
7Omo Njambi waluvalele, asi aningangele nakujaja,
na maluvula a minkinda alinikile nakushengenya!
8Co vwisi vwatuukile mu majulu endi,
mulangi wakunyongesa,
na manungu a tuhya vyatundile mu kanwa kendi.
9Watavwile lilu nakulisholola, wezile ano asi,
co lishelwa lyakuzivala vwii lyakele mwisi ya mendi endi.
10Ikeye wapulwile vwasi akamwa ya kelumbi,
co wendele a mambava a lihunzi.
11Wavandele mu lisusulungu,
mashelwa a kuhima a nyonzi amufwikile.
12Nyonzi ya mamanya na milangi ya tuhya
vyatundile ku mihyato ije yakele kulutwe lwendi.
Co vyasholokele mu mashelwa akuzivala.
13Asinoni Shukulu Kalunga walumine mwilu,
na lijwi lya wa Akamwa ya Akamwa valizivile.
14Co ikeye washele mikili yendi nakushandola vitozi vendi,
nakuhyahyata kwa mihyato wavashekele.
15Kwisi ya mema a kalunga kwasholokele,
co luvula lwa kaye lwafukukile omo wakandele vitozi vove,
yove Shukulu Kalunga,
waluvalele nakwaana ngwe ndumba.
16Shukulu Kalunga wolwele livoko lyendi oku ali mwilu
nakunjikwata,
co wanjijavulwile mu mema akulova.
17Wanjamenene ku vitozi vange va nzili,
na kuli voshe vaje vanjizindile,
omwo vanjihyanene nzili.
18Omo njakele mu tuyando vanjilwisile,
oloni Shukulu Kalunga wanjinyungile.
19Wanjikwasele kunjitundisa mu vushonde,
wanjamenene omwo wavwaelelele nange.
20Shukulu Kalunga anjana cikandelela
omwo nji muka-kulinga mwamuvwa,
ikeye anjivezikisa omwo kunjesi na mulonga.
21Njinononoka lishiko lya Shukulu Kalunga,
co kunjakengesele nima Njambi yange.
22Njinanyungu mashiko endi oshe,
kunjavyanene kwononoka mashiko endi embwe.
23Nazivuka ngeci kunjesi na mulonga,
co njalinyunga ku vuvi.
24Ngecivene, anjana cikandelela omwo njikalingi vyavivwa,
omwo azivuka ngeci kunjesi na mulonga.
25Shukulu Kalunga,
yove wapwa wa kulongwa kuli vaje va kulongwa kuli yove,
co wapwa wamuvwa kuli vaje vavavwa.
26Yove wapwa wakujela kuli vaje vakujela,
oloni ukamwesa vukalu kuli vaka-vuvi.
27Yove ukamena vaje vaka-kulikeesa,
oloni ukakeesa vaje valyalesa.
28Yove Shukulu Kalunga wapwa ceke,
tundisa lisusulungu lyange.
29Njane nzili yakulwisa vitozi vange,
na nzili yakufungulula vimpaka.
30Ou Njambi vilinga vyendi vyapwa vyakulumbunuka,
na majwi endi apwa akulitulao!
Ikeye wapwa ntelo kuli voshe vaje vatewela muli ikeye.
31Shukulu Kalunga endi lika ikeye Njambi,
Njambi endi lika ikeye cimpaka cetu.
32Ikeye Njambi muka-kunjana nzili,
uje avwaesa ngila yange kupwa yakujela.
33 #
Hamba 3:19
Ikeye ashatukisa mendi ange lumbisi ngwe shonge,
anjinyunga mwamuvwa a minkinda.
34Ikeye anjilongesa kulwa nzita,
ngecivene, mavoko ange ase kunana
vuta vwa lusipa vwakukola.
35Njinyunge nakunjamena yove Shukulu Kalunga,
kunyunga kwove kunanjitsimanesa,
na nzili yove inanjinyungu mwamuvwa.
36Yove unanjinyungu kunjitundisa mu vundungo,
co nalumo lwai njinau.
37Njisheka vitozi vange nakuvafungulula,
kunjilikela noo njinavanyongesa.
38Njivawisila asi, co kuvasa lalo kwindukao,
valala ku myanja yange omo njinavafungulula.
39Omwo yove unanjana nzili yakulwa nzita
nakufungulula vitozi vange.
40Yove u muka-kusheka vitozi vange
ngeci vatunde kuli yange,
co njinyongesa vaje vanjizinda.
41Vatambeka ngeci vavakwase,
oloni naumo wai avamena,
vatambeka kuli Shukulu Kalunga,
oloni kavakumbulula.
42Njivatsena tsenu-tsenu
ngwe likungu lije lipekumuka na lihunzi.
Njivalyatangela ngwe lindova lya mu vingila.
43Yove unanjamena kuli vanu vaka-kutengulukila,
nakunjipwisa muka-kushwana miyati,
vanu vaje kunjazivukile ololo vanjipangela.
44Vaka-kwija vatsikama kuli yange,
omo vaziva lijwi lyange, co vanjononoka.
45Kusimpa kwavo kulinakuhwa,
co vakatunda mu vimpaka vyavo oku vajaja.
46Shukulu Kalunga wayoya!
Shangazaleni muka-kunjilwila!
Ambululeni vukama vwa Njambi muka-kunjamena.
47Ikeye muka-kunjihyanesa ku vitozi vange,
nanjifungulwila miyati ngeci vakale mwisi yange,
48nakunjamena ku vitozi vange.
Yove Shukulu Kalunga njihyanese ku vitozi vange
nakunjinyunga ku vaka-lwozi.
49 #
Lom 15:9
Ngecivene, njikakushangazala akati ka miyati,
njikaimba nakukushangazala.
50Njambi akana kuhyana kwakama kuli mwene yendi,
asholola cizemo cendi cije kucesi kutenguluka
kuli uje wendi yanaangula,
kuli Ndaviti na vatekulwila vendi ku myaka yoshe.
The Bible in Mbunda ©The Bible Society of Zambia, 2006