Myaso 17
17
Lilombelo lya munu wa kulongwa
Lilombelo lya Ndaviti
1Yove Shukulu Kalunga,
tolilila mutambi wange wakukulambelela
ngeci unjilingile vushunga,
ziva mutambi wange wakunjikwasa!
Ziva lilombelo lyange lya vushunga.
2Yove ukanjisompela mu vushunga,
omwo yove uzivuka vije vya vushunga.
3Yove uzivuka mbunge yange.
Yove unaija kuli yange a simbu ya vutsiki.
Unanjiilula mwamuvwa,
co kuwawanene mashungu a vuvi muli yange.
4Yange kunjesi kwendeka vyavivi
ngwe muvakendeka vakwetu,
co njinononoka mashiko ove,
kunjakavangeyeye vingila vya vaka-vuvi.
5Visimbu vyoshe njinende mu ngila yove,
co kunjatundilemo.
6Njilomba kuli yove Njambi yange,
omwo ukanjikumbulula, co tolilila majwi ange.
7Sholola cizemo cove cakukomokesa
co njamene,
yove ukanjamena na livoko lyove lya cilyo
ku vitozi vange.
8Njinyunge ngwe muukanyungu mun̄andi wa lisho,
co njinyunge ngwe mwakanyungu kazila
vana vendi mu mambava endi
9nakunjamena kuli vaka-vuvi vaje valinakunjilwisa.
Vitozi vange vananjizengeleka,
co vashaka kunjitsiya,
10vakevo kuvesi na mema ku mbunge,
co vendeka na kulyalesa.
11Ololo vananjizengeleka laja,
vashakezeka akunjiwanena ngeci vanjilwise.
12Vakevo vanafu ngwe vindumba,
vashaka kunjisanyozola sanyu-sanyu,
ngwe vakwenje va vindumba
valinakumwengelela mu vushweke.
13Ija, yove Shukulu Kalunga,
popolola vitozi vange nakuvafungulula!
Njamene kuli vaka-vuvi na moko yove ya mukwale.
14Yove Shukulu Kalunga,
njamene na livoko lyove
ku vanu vaje valinakuvwaelela
nakuyoya kwa ano asi.
Vahise na tuyando tuje tuwavatulikila,
tupwe twatungi kuli vana vavo,
tupwe lalo twatungi kuli vatekulwila vavo!
15Oloni yange njikamona cihanga cove mu vushunga,
co omo njikakasumuka mu tulo,
njikajolela akumona cifwa cove.
The Bible in Mbunda ©The Bible Society of Zambia, 2006