Myaso 148
148
Mutambi wa vyoshe vyakutanga vishangazale Njambi
1Shangazaleni Shukulu Kalunga!
Shangazaleni Shukulu Kalunga mwilu ya melu!
2Mushangazaleni, yeni tungelo twendi voshe,
mushangazaleni, yeni mbunga yendi ya mwilu!
3Mushangazaleni, litangwa na ngonde,
mushangazaleni, vingongonosi vyoshe
vyakuvyazima!
4Mushangazaleni, yeni melu ya melu,
neni mema akala akamwa ya melu!#148:4 MEMA AKALA AKAMWA YA MELU: Kenga Kushangumuka 1:6-7.
5Vyuma vyoshe vishangazale lizina lya Shukulu Kalunga!
Omwo ikeye washikile, co vavitangele.
6Akushika kwendi wavyakele mu myela yavyo
ku myaka yoshe,
lishiko lyendi kulikatenguluka embwe.
7Vyuma vyoshe vili ano asi vishangazale Shukulu Kalunga,
vikashama va mu mema a kalunga
na vinzinga vyoshe vya mema a kalunga,
8muhyato na nyonzi ya mamanya,
mema akukonda na mashelwa,
lihunzi lyakama lije lyononoka kushika kwendi!
9Mushangazaleni, yeni malundu na minkinda,
miti ya vushuka na miti ya kendale,
10tusitu voshe na vingombe voshe,
tusitu vakulikoka na tuzila vakupulula!
11Mushangazaleni, yeni vimyene na vanu voshe,
vana va vimyene na vaka-kushwana voshe,
12vakwenje na vambanda, vakulunu na vanike lalo!
13Vyuma vyoshe vyakutanga vishangazale
lizina lya Shukulu Kalunga!
Omwo lizina lyendi lyapwa lyakama
kuhyana mazina oshe,
vumpau vwendi vwapwa vwakama
kuhyana lilu na asi!
14Wakolesele muyati wendi na nzili,
ngeci vanu vendi voshe vamushangazale,
vanu vendi va Isalele, vaje vazema manene!
Shangazaleni Shukulu Kalunga!
The Bible in Mbunda ©The Bible Society of Zambia, 2006