Myaso 147
147
Kushangazala Njambi Muka-nzili yoshe
1Shangazaleni Shukulu Kalunga!
Mwamuvwa kwimba myaso
kuli Njambi yetu
yakumushangazala,
cinapu cacivwa na vushunga
kumushangazala.
2Shukulu Kalunga atungulula Yelusalema,
elwisa vanu va mu Isalele ku vunzinda.
3Akangwisa vaka-kuzeya mu vimbunge,
nakusaka vimbandu vyavo.
4Ikeye alava vingongonosi nakuviluka mazina avyo vyoshe.
5Shukulu Kalunga ketu wapwa wakama,
na nzili yendi yapwa yakama,
ikeye azivuka vyuma vyoshe.
6Shukulu Kalunga akakwasa vaka-kulikeesa,
oloni vaka-vuvi avawisila asi.
7Imbileni Shukulu Kalunga myaso yakumushangazala,
imbileni Njambi yetu myaso yakumushangazala a tulyalya.
8Ikeye wafwika melu na mashelwa,
nakunyokesa nyonzi ano asi,
ngeci a malundu amene mwila.
9Ikeye aana vyakulya ku tusitu nakulisa vana va makololo
omo vatambeka.
10Shukulu Kalunga kesi kuvwaelela mu nzili ya tuvalu,
nambe kesi kuvwaelela na mashwalale vakunyanyama,
11oloni avwaelela lika muli vaje vamukomoka,
na muli vaje voshe vakulaela mu cizemo cendi
cije kucesi kutenguluka.
12Yove Yelusalema shangazala Shukulu Kalunga!
Yove Siyone shangazala Njambi yove!
13Omwo ikeye akolesa vikolo vyove,
nakuvezikisa vanu vove.
14Ikeye aana kwoloka kuluu ku vinginga vyove,
nakukwana tiliku yaivwa ngeci ulye.
15Atuma mashiko endi ano asi,
co vanu vawononoka.
16Afwika asi na mbundu ngwe nanga yakutoka,
nakushandola mema akukonda ngwe lito.
17Atuma nyonzi ya mamanya ngwe mamanya akutavozola,
naumo wai asa kusimpa ku lisika lije lyakatumu.
18Asinoni ashika,
co aje mema akukonda asangunuka,
atuma lalo lihunzi, co mema enda.
19Atuma majwi endi kuli vanu vendi,
atuma vilongesa vyendi na mashiko endi ku Isalele.
20Kalingile cuma eci na miyati yeka embwe,
omwo vakevo kuvazivuka mashiko endi.
Shangazaleni Shukulu Kalunga!
The Bible in Mbunda ©The Bible Society of Zambia, 2006