Visimo 9
9
Mana na vulema
1Mana anatungu njuvo yawo, nakuyishongela vimanda vyayo vitanu na vivali. 2Mana anatsii tusitu twa a ciwano, co anatsingasana vinyu, nakujala mesa. 3Akewo anatumu vangamba vendi va vambanda mukutambeka a mitambela yakulunduka mu vinganda ngwawo, 4“Voshe vanu vakweeva vaije kuno!” Co ku vilema endeka ngwawo, 5“Ijeni mulye ku vyakulya vyange nakunwa ku vinyu vinjinatsingasana. 6Tundeni mu munga ya vanu vakweeva ngeci muyoye, co endeni mu ngila ya mana.”
Mana a vushunga
7Nga unangula muka-kulyalesa, co ulinenela shwamwa. Nga wendekela muka-vuvi, ulipesa lika ngoco. 8Kesi unangule muka-kulyalesa, akakuzinda lika ngoco. Oloni nga unangula munu wakunyanyama, co munu wa cifwa cangacije akakuzema. 9Cuma coshe cije wendeka na munu muka-mana, cikamunyanyamesa. Vyoshe vije viwuleka muka-vushunga, vikawezelela ku mana endi.
10 #
Yom 28:28; Mya 111:10; Vis 1:7 Kwononoka Shukulu Kalunga, cikeco vushangumukilo vwa mana. Nga uzivuka Njambi Wakujela, co unapu muka-kuzivisisa. 11Mana akakuwezelela ku myaka yakuyoya kwove. 12Yove ukavezika nga ukakala na mana, oloni nga uwavyana, co ukapwa munu muka-kuyanda.
Cilanyo ca cilema
13Kweeva kunapu ngwe munakazi wa kanwa, munakazi wa shwamwa. 14Ikeye akatumbama ku cikolo ca njuvo yendi, nakutumbama a mwela wakulunduka wa mu nganda, 15nakutambeka ku vanu vaje valinakwita nakuliila kwavo ngwendi, 16“Yeni vilema, ijeni mukovele muno!” Co ku vanu vakweeva endeka ngwendi, 17“Mema akwiva apwa amavwa manene, na likende lyakulila mu vushweke lyapwa lyalivwa manene.” 18Vanu va luvinda kuvazivuka ngeci vanu vaje vakai ku njuvo yendi, vanatsi laja, vaje valivangele kukovelamo ololo vali mu vukalo vwa vatsi.
The Bible in Mbunda ©The Bible Society of Zambia, 2006