Visimo 8
8
Kushangazala mana
1Tolilila! Mana alinakusana.
Kuzivisisa kulinakutambeka.
2Mana alinakutambeka oku anemana,
akamwa ya malundu kuyehi na ngila,
na a masambwa-ngila.
3 #
Vis 1:20-21
Mana anemana ku cikolo ca nganda,
na kumukulo wa vikolo,
alinakutambeka ngwawo,
4“Njilinakumisana, yeni vanu voshe va ano asi.
5Kanda mukole ndi?
Lilongeseni kupwa ngwe vakulunu.
Kuma mu vilema ndi?
Lilongeseni kukala na mana.
6Tolilileni ku majwi ange amavwa,
vyoshe vinjimileka vinapu vya vushunga.
7Simbu yoshe njikendeka vushunga,
yange njazinda makuli.
8Vyuma vyoshe vinjendeka vinapu vya vushunga,
kunjekwendeka cuma ca makuli
nambe kwendeka cuma cakumitanukisa embwe.
9Oshe anapu majwi a vushunga
kuli uje awazivisisa,
co lalo amavwa kuli vaje vali na mana.
10Angula vilongesa vyange
na mana ange kutuvakana siliva,
nambe ngolinde yaivwa.
11“Yange njapwa mana,
njinatuvakana mamanya a seo,
cuma nacimo cai cilyeseka nange.
12Yange njapwa mana, nji muka-kunongonona,
njili na mana na kusompa kwakuvwa.
13Kusingimika Shukulu Kalunga kukekwo kuzinda vuvi,
yange njazinda kulyalesa nakulyaka ku vukama,
njazinda lalo vingila vya vuvi
na majwi a makuli.
14Njikatumbu matumbe nakuwalinga,
nji muka-kuzivisisa, co njapwa muka-nzili.
15Njikakwasa vimyene kushwana,
na vaka-kushwana kutunga mashiko amavwa.
16Vaka-kushwana, na vaka-vulemu voshe va ano asi
valinakushwana akukwasa kwange.
17Njizema vaje vanjizema,
voshe vaje vanjishakezeka vasa kunjiwana.
18Njasa kwana vufuko na kasingimiko,
vufuko vwa myaka yoshe, nakuvezika.
19Vije uwana kuli yange vinapu
vyavivwa kutuvakana ngolinde yaivwa,
kutuvakana siliva yakujela.
20Njikende mu ngila ya vushunga, nakukava vingila vyakushungama,
21njikana vufuko vwavungi kuli vaje vanjizema, nakushulisa vinjuvo vyavo na vufuko.
22 #
Kuj 3:14
Akulivanga Shukulu Kalunga watangele yange,
vikevyo vyapwile vipangi vyendi vyakulivanga
vya ku san̄ulu.
23Yange vanjitangele avushangumukilo,
simbu kanda vatange kaye.
24Njasemukile simbu kanda mema a kalunga akaleko,
simbu masima a tuvwelu-vwelu akaleko.
25Yange njasemukile simbu kanda minkinda ikaleko,
simbu kanda malundu vawatumbike mu myela yawo.
26Simbu kanda Njambi atange kaye na mahya amwo,
nambe kutanga livu lya mu kaye.
27Yange kunjakele omo watumbikile lilu
mu mwela walyo,
omo wajangumwine lilu akamwa ya mema a kalunga.
28Njakele nendi omo waakele mashelwa mwilu,
omo washokolwele masima a tuvwelu-vwelu,
twa mema a kalunga,
29yange kunjakele omo watwile nginga ya mema a kalunga,
ngeci mema a kalunga amwononokele.
Yange kunjakele omo wajalele luvula lwa kaye.
30Njakele kuyehi na Shukulu Kalunga,
ngwe munendi wamundondo,#8:30 MUNENDI WAMUNDONDO: Nambe, kumukwasa kutumba nakutunga.
njamuvwaelelesele a litangwa na litangwa,
co nange lalo njavwaelelele ku mesho endi,
31njavwaelelele na kaye,
co lalo njavwaelelele na vanu vamwo.
32“Co ololo yeni vakwenje, tolilileni kuli yange.
Lingeni ngwe muje njendeka, co mukavwaelela.
33Tolilileni vije njimilongesa.
Pweni vaka-kunyanyama, co kesi muvyombwanese.
34Navezika munu uje atolilila kuli yange,
munu uje atumbama ku cikolo cange,
a litangwa na litangwa,
munu uje avandamena ku cikolo ca ku njuvo yange.
35Woshe uje anjiwana awana mwonyo,
co Shukulu Kalunga akavwaelela nendi.
36Woshe uje kanjiwana,
alivulumuna lika ikeye vavenya,
voshe vaje vanjizinda, vazema kutsa.”
The Bible in Mbunda ©The Bible Society of Zambia, 2006