Visimo 10
10
Visimo vya Solomoni
1Evi vikevyo visimo vya Solomoni.
Mwana wa mana avwaelelesa ishe, oloni mwana wakweeva akolesa vaina shwamwa.
2Vufuko vwakuwana mu ngila yaivi kuvwesi na seo, oloni kulongwa kwamena mwonyo wove.
3Shukulu Kalunga kakatava vaka-vushunga vakale na njala, oloni vaka-vuvi avavindika kuwana vije vivashaka.
4Kukala na vulwa kunena vuutu, oloni kupanga na nzili cikupwisa ufuki.
5Munu muka-mana aungulula vimbuto a simbu ya kuteja, oloni cinapu cuma ca shwamwa kulala a simbu ya kuteja.
6Muka-vushunga atambula vivezikiso, oloni vuvi vuvanda mu majwi a vaka-vuvi.
7Vanu vaka-vushunga simbu yoshe vakavanuka ngwe civezikiso, oloni vaka-vuvi vakavevala.
8Munu muka-mana akatava kumunangula. Oloni vaka-kwendeka vya vulema vakanyonga.
9Uje enda mu vushunga ikeye enda mu kwoloka, oloni uje enda mwa kupenga-penga vakamukwata.
10Munu wa kwendeka vushunga anena vukalu, oloni uje endeka civembulu anena kwoloka.
11Majwi a muka-vushunga anapu lisima lya mwonyo, oloni vuvi vunavanda mu majwi a vaka-vuvi.
12 #
Yak 5:20; 1 Pet 4:8 Cizindo cikashangumuna vimata, oloni cizemo cifwika milonga yoshe.
13Vihwanga vakendeka vya mana, oloni vilema vashaka lika kuvahisa.
14Vaka-kunyanyama vakawana mana, oloni vilema vanena lika vukalu.
15Vufuko vwa muka-kufuka vunapu cimpaka cendi, oloni vuutu vunyongesa kautu.
16Cikandelela ca muka-vushunga cinapu mwonyo, oloni vuvi vutwamenena lika ku vuvi vwakama.
17Vanu vaje vatolilila omo vavanangula vakayoya, oloni vaje kuvatava ngeci vanaviisa, vali mu vushonde.
18Munu muka-kushweka cizindo cendi wapwa muka-makuli, co munu woshe uje afweya napu cilema.
19Kwendeka manene kukakoko kuviisa, nga wanyanyama, oloka lika kuluu.
20Majwi a muka-vushunga anapu ngwe siliva yakujela, oloni viyongola vya muka-vuvi vinapu vyangoco.
21Majwi a muka-vushunga ahwimisa vimbunge vya vanu vavangi, oloni nga u cilema, co wasa kulitsiya lika yove vavenya a mana.
22Civezikiso ca Shukulu Kalunga cikeco cikufukisa. Kupanga na nzili kucasa kukufukisa.
23Cinapu vulema kujolela akulinga vuvi, vihwanga vavwaelela na mana.
24Vaka-vushunga vakawana vivashaka, oloni vaka-vuvi vakawana vije vivajujwisa manene.
25Lihunzi lyakama liija, co vaka-vuvi vakapekumukila kulyala, oloni vaka-kulongwa Njambi akavemanesa mbe.
26Kesi utume mulwa akupangele cuma cimo, ikeye napu ngwe vinyu vyakungangamena ku mayo ove, nambe ngwe vwisi vutapata mu mesho ove.
27Nga wononoka Shukulu Kalunga, co ukayoya simbu yakama, oloni vaka-vuvi vakatsi omo simbu yavo kanda yete.
28Cinyangavili ca muka-vushunga citwamenena kukujolela, oloni vaka-vuvi navimo vyai vakengelela.
29Shukulu Kalunga akanyungu vaka-kulongwa, oloni akanyongesa vaje vaka-kulinga vya kupenga-penga.
30Vaka-vushunga simbu yoshe vakakala mwamuvwa, oloni vaka-vuvi kuvakakala mu lifuti.
31Vaka-vushunga vakendeka vya mana, oloni ndaka ije yendeka vya vuvi vakayolwesa.
32Vaka-vushunga vazivuka vyuma muka vivanapande kwendeka, oloni vaka-vuvi simbu yoshe vakendeka vyuma vije vivavalesa munu ku mbunge.
The Bible in Mbunda ©The Bible Society of Zambia, 2006