Visimo 7
7
1Munange, anuka evi njilinakwendeka, co kesi wivale kulinga vinjinakuleke. 2Nyunga mashiko ange, co ukayoya, nyunga vilongesa vyange ngwe muukanyungu vufuko vwaseo yakama. 3Nyunga vilongesa vyange simbu yoshe, co visoneke mu mbunge yove. 4Mana apwe ngwe ndokazi yove, co kuzivuka kupwe ngwe musamba wove wa a mbunge. 5Vilongesa evi vikakunyunga ku majwi akuseveleka a vanakazi va vakweni.
Munakazi wa cikwizi
6A simbu imo, omo njakengele anja mu njanena ya njuvo yange, 7co njamwene vakwenje vavangi vakweeva, oloni akati kavo, njazivukileo mukwenje umo wakweeva manene. 8Ikeye wakele nakwenda mu tapalo, kuyehi na masambwa-ngila kuje kwakele munakazi umo. Co mukwenje ou wetile kuyehi na njuvo ya uje munakazi, 9yapwile simbu ya cingwezi omo kwazivala laja. 10Co uje munakazi waliwanene na uje mukwenje, uje munakazi wazalele vuzalo vwa vukwizi, co wakele na vutumbe mu mbunge yendi. 11Uje munakazi wapwile wakukenyuka, wakujeneka shwamwa, co simbu yoshe wakele nakwendangana mu vitapalo, 12nakwimana a masambwa-ngila, na mu vitapalo, na mu mitambela ya vulandeselo vwa vyuma. 13Wavumbatelele uje mukwenje, nakumutsemba, co akukaluka kwendi wendekele ngwendi, 14“Lelo njinakombelela vin̄ombelo vya kulitombola, co lalo njili na situ ije inasalao yakulingisa ciwano. 15Njinakushakezekele, co njinakuwana. 16Njinafwiki vulili vwange na vinanga vya linyu vya mavala-mavala vya ku Ingito. 17Njinakwitiho mazi a miila, na malimangango, na sinamone. 18Ija tuvwaelele na cizemo vutsiki vwoshe. Tujolele amo na cizemo. 19Munalume wange waiho embo, nai vungenzi vwa kulyala. 20Nambatele vimbongo vyavingi, co kaija vwasi noo visimano vivali.” 21Ngecivene, uje munakazi wazembelekele uje mukwenje nakumweseka na majwi endi akuseveleka. 22Aje vene waile nendi ngwe ngombe aya nakumutsiya, nambe ngwe mbambi uje atsa mu mweto, 23noo mukili ukamutiva a mbunge, mukwenje nafu ngwe kazila uje atsa mu mweto, kazivukile ngeci mwonyo wendi uli mu vushonde.
24Ngecivene, yeni vana vange, tolilileni kuli yange, zivilileni evi njendeka. 25Kesi mutave munakazi wa cifwa cangacije akoke vimbunge vyeni, kesi muye nakumukavangeya. 26Munakazi wa cifwa cangacije naviisa nakutsiisa vanalume vavangi vaje naumo wai asa kuvalava. 27Nga muya ku njuvo yendi, co muli mu ngila yakuya ku vukalo vwa vatsi. Ikeyo ngila yayasi yakuya ku kutsa.
The Bible in Mbunda ©The Bible Society of Zambia, 2006