Visimo 6
6
Kunangula kukwavo lalo
1Munange, kuma wakulaesele kulyamena na likongo lya mukweni ndi? 2Co majwi ove anakukwata ngwe mweto. 3Nga unalingimo munange, co yove uli mu mavoko a uje munu, oloni eyi ikeyo ngila yakutundamo, unapande kuya kuli ikeye, likeese nakumulomba ngeci akusambese. 4Unapande kulinga ngeci simbu kanda ulale, nambe kuhwima. 5Tunda mu mweto ou ngwe kazila, nambe ngwe mbambi atewa ciyambi.
6Vaka-vulwa vanapande kulilongesela akuyoya kwa mishwa. 7Vakevo kuvesi na ntwama, nambe mwene, nambe mwata, 8oloni vakakungulula vyakulya vyavo a simbu ya ndombo, nakulivwaesela a cisika. 9Visimbu vingaijo ukalala, yove mulwa? Simbu ikajo ukenduka? 10Wendeka ngwove, “Njicishuluvaleko lika. Njihwimeko kamandondo.” 11#Vis 24:33-34 Oloni omo uje mulwa acili mu tulo, vuutu vukamulwisa ngwe lipwepwe.
12Vanu vakujeneka seo, vakevo lalo vaka-vuvi vakai nakwitanganamo nakwendeka vya makuli. 13Vakemwina na mesho, co vanyateya na milavo mukukwisa vakwavo. 14Simbu yoshe vatumba matumbe a vuvi mu vimbunge vyavo, co vashangumuna vukalu kwoshe-ikwoshe. 15Omwo a eci, vwasi-vwasi n̄avava ikaija ali vakevo, co vakavulumuka manene kujeneka kukanguka. 16Kuli vyuma vitanu na vivali vije Shukulu Kalunga vyazinda,#6:16 VYUMA VITANU NA VIVALI: Mu ciHevelu ngwavo, vyuma vitanu na cimo nambe vitanu na vivali vije Shukulu Kalunga vyazinda. Kenga 30:15,18. vikevyo vyapwa vya vunyengwe kuli ikeye.
17Kulyalesa nakwendeka makuli,
kutsiya vanu vakujeneka mulonga,
18mana akuyongwela vakweni matumbe amavi,
vanu vaje vazambula mukulinga vuvi,
19vukaleo vwa makuli ali mukwavo,
na munu uje muka-kushangumuna vukalu akati ka vakwavo.
Kunangula a vupangala
20Munange, nyunga lishiko lyakuleka isho, co kesi wivale vilongesa vya vanyoko. 21Nyunga majwi avo simbu yoshe, ashweke mu mbunge yove. 22Vilongesa vyavo vikakutwamenena mu ngila omo wenda, vikevyo vikakunyunga ku vutsiki omo ulala, nakukunangula ku mutanya omo winduka. 23Vilongesa vyavo vyapwa ceke, kunangula kwavo kukakulongesa mwakuyoyela. 24Kunangula oku kukakutundisa ku vanakazi vavavi, nakukutundisa ku majwi akukokweya a vanakazi va vakweni. 25Kesi utave munakazi wa cifwa cangacije akukokweye na vuvwa vwendi, nambe na mesho endi embwe. 26Munalume asa kukumuna cikwizi na ndando ya mukasha wa likende, oloni kulinga vupangala na munakazi wa mukweni cikamanesa vyoshe vije ulinavyo.
27Kuma wasa kwambata tuhya a nulo yove na vuzalo vwove kujeneka kwenya? 28Kuma wasa kwenda a manungu a tuhya mendi ove kwenya ndi? 29Cinapu vushonde vwakama kulala na munakazi wa mukweni. Woshe uje acilinga, vakamuhisa. 30Vanu kuvesi kuvayesa mwizi nga aiva vyakulya omo ali na njala, 31oloni nga uje mwizi vanamukwata, co napande kufweta visimbu vitanu na vivali, a vyuma vije vyevile, co napande kufweta vyoshe vije vyali navyo. 32Oloni munu uje alinga vupangala kesi na mana. Alinakulinyongesa lika ikeye vavenya. 33Kuvakamusingimika embwe, oloni vakamupupa, nakumushendumuna simbu yoshe. 34Kuluvala kwa munalume omwo lifuwa lya munakazi wendi kumunenesa kulinga muuka, co kakala lalo na mema ku mbunge omo alinga shambandinga. 35Kakatambula ndando yakumufwetela, kukwesi vwana vwavungi vuje vukasa kuhwisa vukalu vwendi.
The Bible in Mbunda ©The Bible Society of Zambia, 2006