Visimo 5
5
Kunangula a vupangala
1Munange, tolilila ku mana ange, zivisisa vije vinjendeka. 2Asinoni ukazivuka mwamuvwa kasingimiko, co majwi ove akamwesa ngeci kuma uli na mana. 3Omwo majwi a munakazi wa cikwizi anapu akupwelelela ngwe vuki, akewo lalo apwa akuseneta kutuvakana mazi a olive, 4oloni ku mamaneselelo majwi endi alula ngwe mwaze, nakuvambuka ngwe moko ya mukwale ya vuvela kuvali. 5Nga umukava, akakushelumwisa kwisi ku vukalo vwa vatsi, ngila yakende ikeyo ngila itwala ku kutsa. 6Munakazi ou kesi mu ngila ije itwala ku mwonyo, oloni alinakwendangana lika, kwakujeneka kunanguka vije vilinakulingiwa.
7Co ololo njitolilileni yeni vana vange, munapande kulinga vyoshe vije njendeka. 8Tundako ku munakazi wa cifwa cangacije! Kesi ushwenye nambe ku cikolo ca njuvo yendi. 9Kutewa ukaana kasingimiko kove ku vakweni, co vaka-muuka vakakutsiya omo ucili uwamundondo. 10Eyo, vangenzi vakambata vufuko vwove vwoshe, na vije viwunapangela vakavyambata vanu veka. 11Ukakemanga ku mamaneselelo a mwonyo wove, omo situ yove na muvila wove vikanyonga, 12co ukendeka ngwove, “Omwo vikajo njazindile kunjinangula? Omwo vikajo kunjatavelele ngeci munu anjendekele? 13Kunjononokele lijwi lya valongisi vange, nambe kuvatolilila. 14Oloni ololo njili na shwamwa ku mesho a vanu voshe.”
15Pwa muka-kulongwa kuli munakazi wove, mwesa cizemo cove kuli ikeye lika. 16Vana vaje uli navo kuli munakazi weka, kuvakakukwasa. 17Vana vove vanapande kukola nakukukwasa, kesi vakwase vangenzi embwe. 18Ngecivene, vwaelela nakujolela na munakazi wove uje iwambatele mu vukwenje vwove, 19apwe wamuvwa kuli yove ngwe shonge. Vuvwa vwendi vukuvwaelelese, co cizemo cendi cikuzengeleke. 20Munange, omwo vikajo uzemena munakazi weka? Omwo vikajo uzema munakazi wa mukweni? 21Shukulu Kalunga amona vyuma vyoshe vije viwulinga. Kwoshe kuje kuuya, alinakukumona. 22Vaka-vuvi vatsa mu ciliva cavo vavenya. Vatsa mu linimbwa lya vuvi vwavo vavenya. 23Vaka-vuvi vatsa omwo kuvesi kulinyunga vakevo vavenya. Vulema vwavo vuvatwala ku mbumbo.
The Bible in Mbunda ©The Bible Society of Zambia, 2006