Visimo 4
4
Mana akwasa
1Vana vange, jendekeleni matwi eni kukunangula kwa ishweni. Tolilileni mwamuvwa ngeci muzivisise. 2Njilinakumyana vilongesa vyavivwa, co kesi museze kunangula kwange. 3Omo njapwile mwana wa munalume, mwana wamundondo umolika kuli vanana, 4tate wanjilongesele wendekele ngwendi, “Mbunge yove ikwate majwi ange, anyunge, co ukayoya.” 5Tambula mana, tambula kuzivuka! Kesi uwevale nambe kutenguluka kutunda ku majwi a mu kanwa kange. 6Kesi uvyane mana, akakwamena, azeme, co akakunyunga. 7Vushangumukilo vwa mana vukevwo ovu, tambula mana, ku vyoshe vije utambula, tambula kuzivuka. 8Zema mana, akakupwisa uwakama. Avumbatele, co akakusingimika. 9Mana akapwa cilongo cacivwa ku mutwe wove, cilongo ca vumpau.
10Munange tolilila kuli yange. Majwi ange akovele muli yove ngeci myaka yakuyoya kwove ikapwe yaingi. 11Njinakulongesa mu ngila ya mana, njinakutwamenena mu vingila vyakushungama. 12Omo wenda kuukatalyangela, omo ushatuka kuukatanuka embwe. 13Kwatelela kunangula, kesi wecele! Cinyunge, cikeco mwonyo wove. 14Kesi wende mu ngila ya vaka-kupenga-penga, nameme kuya mu ngila ya vaka-vuvi. 15Litengeko, kesi uye ushwenye kuyehi nayo, tenguluka, ya mu ngila yove. 16Omwo vaka-vuvi kuvesi kulala tulo kuvanga vanalingi cuma cimo cacivi, vakalala cilavu-lavu noo vanavulumuna munu. 17Vakali kupenga-penga ngwe likende, vakanu muuka ngwe vinyu.
18Ngila ivakende vaka-vushunga inapu ngwe kutuuka kwa litangwa lije litwa ceke noo lyalondo njamba. 19Oloni ngila ya vaka-vuvi, inazivala vwii ngwe lisusulungu, vawila asi, oloni kuvamono vije vinavatanukisa.
20Munange, jendekela matwi ove kukunangula kwange. Tolilila majwi ange. 21Kesi utave ngeci akuseze. Anuke nakuwanyunga mu mbunge yove. 22Majwi awa akana mwonyo navukangule kuli munu woshe uje awazivisisa. 23Nyunga viyongola vyove, omwo viyongola vyove vikevyo kavwelu-vwelu ka mwonyo. 24Kesi wendeke cuma ca makuli. Kesi ulinge makuli nambe kwendeka majwi akutanganesa. 25Mesho ove akenge kulutwe lwove, kesi ukenge noku-noku. 26#VaHe 12:13 Zivuka kuje kuulinakuya, co ukemana a livu lyakukola. 27Kesi utunde mu ngila ya vushunga. Oloni tunda ku vuvi.
The Bible in Mbunda ©The Bible Society of Zambia, 2006