Visimo 3
3
Kunangula vakwenje
1Munange, kesi wivale vilongesa vyange. Simbu yoshe mbunge yove inapande kunyunga mashiko ange. 2Nga ulingamo, vikakukwasa kuyoya myaka yaingi, vikakwana kuyoya kwa kwoloka. 3Kesi wivale cizemo na kulongwa. Vikutiiye mu mukoshi wove, visoneke mu mbunge yove. 4#Luk 2:52 Nga ulingamo, Njambi na vanu vakakusingimika, co ukakala na lizina lyalivwa.
5Kulaela kuli Shukulu Kalunga na mbunge yove yoshe. Kesi ujendamene ku mana ove vavenya. 6Simbu yoshe tava Shukulu Kalunga ngeci akutwamenene, co akakumwesa vingila vya vushunga.
7 #
Lom 12:16
Kesi ulimone ngwe u muka-mana embwe, oloni komoka Shukulu Kalunga, tunda ku vuvi. 8Muvila wove ukakala mwamuvwa na nzili. 9Singimika Shukulu Kalunga akumulambwila vyuma vyoshe vyavivwa vije viwukateja mu lihya lyove. 10Co vishete vyove vikashula na vimbuto, ukakala na vinyu vyavingi vije kuukawana naa akuvyaka.
11 #
Yom 5:17
Munange, kesi uyeluwise kushungamesa kwa Shukulu Kalunga, kesi uvyane kunangula kwendi. #VaHe 12:5-6 12#Kuj 3:19 Omwo Shukulu Kalunga akashungamesa vaje vaazema, ngwe muje cisemi mwakashungamesa mwana uje yavwaelela muli ikeye. 13Vavezika vanu vaje vawana mana, vaje vawana kuzivisisa. 14Kukala na mana kunatuvakana kukala na vimbongo, kukala nao kucilyeseka kukala na ngolinde. 15Mana ali na seo yakama kutuvakana mamanya a seo, navimo vyai viwushaka vilyeseka na mana. 16Mana akeo akuyoyesa matangwa amangi, akwana lalo vufuko na kasingimiko. 17Akeo akuvwaelelesa mukuyoya kwove, co lalo akutwamenena mu kwoloka. 18Mana anapu ngwe muti wa mwonyo, nsina yakuvwaelela kwa voshe vaje vauvumbatela.
19Shukulu Kalunga watangele kaye na mana endi,
mukuzivuka kwendi waakele lilu mu mwela walyo.
20Mana endi alingisile mema amangi ngeci alyangunuke,
na mashelwa kunyokesa nyonzi ano asi.
21Munange, nyunga mana ove nakuzivuka kwove kwakuvwa. Kesi vitunde muli yove. 22Evi vikakwana mwonyo, mwonyo wauvwa ngwe sungu. 23Asinoni ukenda nakundikangela mu ngila yove, co kuukatanuka. 24Kuukazivi lyova omo uya a vulili nakulala, ukalala mwamuvwa vutsiki vwoshe. 25Kesi ulishoshomwene a tuyando twa cishitumukila, tuje tukaija a vaka-vuvi ngwe lihunzi lyakama. 26Shukulu Kalunga akapwa cinyangavili cove. Kakakwecelela ngeci utse mu mweto.
27Kesi uvindike vuvwa vwa vaje vanavupande, nameme nzili yakulinga cije ulinaco. 28Kesi uleke mundambo wove ngwove, “Ya kwimbo, ija imene njakukwane,” omo cuma cije cashaka yove ulinaco. 29Kesi utumbile mundambo wove vutumbe vwakumuvulumuna, ikeye wayoya nove mu kwoloka, wakukulaela. 30Kesi ulinge vimata na munu kwakujeneka kashwilo nga kakuvulumwine. 31Kesi uliveyele vaka-muuka nambe kwangula kukava vingila vyavo, 32omwo Shukulu Kalunga wazinda vaka-kulinga vuvi, wakulaela vaka-kushungama. 33Cisingo ca Shukulu Kalunga cakala a njuvo ya muka-vuvi, oloni akavezikisa membo a vaka-vushunga. 34#Yak 4:6; 1 Pet 5:5 Shukulu Kalunga akayeluwisa vaje vamuyeluwisa, amwesa cizemo kuli vaka-kulikeesa. 35Vaka-mana vakashwana kasingimiko, oloni vilema vakaziva shwamwa.
The Bible in Mbunda ©The Bible Society of Zambia, 2006