Visimo 2
2
Cikandelela cakukala na mana
1Munange, lilongese vije vinjikuleka, nyunga mashiko age. 2Jendekela litwi lyove ku majwi a mana, aake mu mbunge nakuwazivisisa. 3Eyo, lomba mana, co lambelela kuzivuka vyuma. 4Shakezeka mana ngwe siliva, ashakezeke ngwe muukashakezeka vufuko vwakushweka. 5Ukazivuka mucinalumbunukila kukomoka Shukulu Kalunga, ukawana lalo mana akuzivuka Njambi. 6Shukulu Kalunga akana mana, kuli ikeye kutunda mana nakuzivisisa. 7Shukulu Kalunga natulikila mana vaka-vushunga nakunyunga vaka-kulongwa, amena vaka-kujeneka mulonga. 8Akanyungu vingila vya vaka-vushunga, nakunyunga vaje vanakundama kuli ikeye.
9Nga unjitolilila, co ukazivuka vyuma vyavivwa mu ngila yaivwa yakushungama. Ukazivuka vije unapande kulinga. 10Mana akaija mu mbunge yove, akavwaelelesa mwonyo wove. 11Kuzivuka kwove nakuzivisisa kwove vikakunyunga, 12mana akakwovola ku ngila ya vuvi, kuli vaje vaka-kwendeka vyavivi, 13vaje vanaseza ngila yakushungama, ngeci vende mu vingila vya lisusulungu. 14Vaje vavwaelela mukulinga vuvi, vajolela mukulinga vyuma vya vunyengwe. 15Vingila vya vanu va cifwa eci vyapwa vya kupenga-penga, vatanguka mu vingila vyavo.
16Mana akakwohyela ku munakazi wa cikwizi woshe, kukukukokweya na majwi endi akuseveleka, 17munakazi wakujeneka kulongwa kuli munalume wendi, nevala cisingo cakujela cije calisingile. 18Njuvo yendi inapu ngwe mbulu, ngila yendi itwamenena ku vukalo vwa vatsi. 19Naumo wai waya nakumusikamesa akeluka. Kakeluka lalo na mwonyo. 20Ngecivene, ukakava ngila ya vanu vavavwa, ukakava ngila ya vaka-vushunga. 21Vaka-vushunga, vakevo vakujeneka mulonga vakakala muno mu lifuti. 22Oloni Njambi akasheka vaka-vuvi mu lifuti, vakapwa ngwe cimena civatukula mu livu.
The Bible in Mbunda ©The Bible Society of Zambia, 2006