Visimo 27
27
1 #
Yak 4:13-16
Kesi ulyalesele a imene, omwo kuwasa kuzivuka vije vikasholoka mukati ka lelo na imene.
2Kesi ulishangazale yove vavenya embwe, vakushangazale vanu veka.
3Vulemu vwa limanya na lishen̄avu, kuvilyeseka nakulema kwa vukalu vuje vuvakanene vilema.
4Kuluvala kwapwa muuka, nakushandola, oloni cipululu cinahyana kuluvala.
5Mwamuvwa kunangula mukweni citona-mesho kutuvakana ayongole ngwendi kuwamumbile mbunge. 6Musamba wove nameme nakuvulumuna anga wamuvwa. Oloni omo citozi akambeka livoko lyendi a citsili cove, co nyanyama!
7Omo unakuta, wasa kuvyana vuki, oloni omo uli na njala, nameme vyakulya vyakulula vipwelelela.
8Omo munu ali kulyala na limbo lyendi, napu ngwe kazila ali kulyala na lishwa lyendi.
9Mazi amavwa akunika mwamuvwa, avwaelelesa ku mbunge, na vusamba vwakukola vukwana nzili.
10Kesi wivale vasamba vove nambe vasamba va isho. Nga uli mu tuyando kesi ulombe ndolome yove akukwase, mundambo uje walyata nendi, asa kukukwasa kutuvakana ndolome yove uje ali kulyala.
11Munange, kala na mana, co njikavwaelela njikasa kukumbulula munu woshe uje anjipaya.
12Vaka-mana omo vamona tuyando twija, co vatwongoloka, oloni muka-kujeneka kuyongola akovelamo, co kulutwe aliveya.
13Vanapande kukutambula cikoveyo cove nga wacanene kupwa kapopo ku mulonga wa mungenzi, apwa ngwe nomo omwo nalizivasana na munakazi wa muyati weka.
14Kumenekela musamba wove mukumwindwisa na lijwi lyakutambekela, kunalifu nakusinga.
15Munakazi wa kanwa napu ngwe muwakandweke mema a nyonzi ya mungole. 16Cinapu cuma cacasi kukwata lihunzi nambe kukumateya mazi mu livoko lyove, kutuvakana kwolwesa munakazi wa kanwa.
17Vanu valilongesa ku vanu na vakwavo, ngwe cikuvo cotanganya cikuvo na cikwavo.
18Uje avwaesa muti wa mukuyu, akalya vushuka vwawo, na munu lalo uje ononoka Shukulu Kalunga kendi, vakamusingimika.
19Omo munu alikengela mu mema, amona cihanga cendi, mukemwo lalo na viyongola vili mu mbunge ya munu vimusholola ikeye vavenya.
20Lishungu lya vanu lyafwa ngwe vukalo vwa vatsi, simbu yoshe viyongola vyeka kuvili.
21Ngolinde na siliva vavyeseka mu tuhya twa lutengo, oloni munu vakamweseka mukumushangazala.
22Nameme upupa cilema manene, vulema kuvutundu muli ikeye.
23Nyunga mwamuvwa vimanga vove, na vingombe vove, 24omwo vufuko kuvwesi kukala simbu yoshe. Nameme vumwene kuvwesi kukala simbu yoshe. 25Omwo mwila wakuma vanaukele, co kumena mwila wauha, co mwila wakumena kumukulo wa lilundu vaukungulwila amo.
26Wasa kutonga vuzalo ku maka a vimanga vove, co ulanda livu na vimbongo uwana akulandesa vimembe vove vamo. 27Co kuje ku vimembe vakwavo lalo kukekwo kuuwana mavele akulwa na naanga vove, amo na vangamba vove voshe.
The Bible in Mbunda ©The Bible Society of Zambia, 2006