Visimo 28
28
1Vaka-vuvi vatewa nambe wai avasheka, oloni muka-vushunga wapwa wakusimpa ngwe ndumba.
2Omo lifuti valitengulukila likala na vaka-kushwana vavangi, oloni nga muli vaka-kushwana vakunyanyama na mana mukala kwoloka.
3Muka-kuutwa uje ayandesa tuutu, napu ngwe nyonzi ya lisindu-mbowe ije inyongesa vimbuto.
4Vaje vavyana mashiko vashangazala vaka-vuvi, oloni vaje vanyunga mashiko valwisa vaka-vuvi.
5Vaka-vuvi kuvazivuka vushunga, oloni vaje vasingimika Shukulu Kalunga vazivuka vushunga.
6Mwamuvwa kupwa kautu na kulongwa, kutuvakana kufuka nakujeneka kulongwa.
7Uje anyunga mashiko napu mwana wa mana, oloni uje alikwata vusamba na vaka-kupenda azivisa ishe shwamwa.
8Uje awezelela vufuko vwendi na kakondweso, nakutambula vya munu mu ngila yalinyanyamena, co vufuko vwove vukaya kuli uje ali na ngozi na tuutu.
9Munu uje kononoka lishiko, malombelo endi kuli Njambi anapu a vunyengwe.
10Uje aungumwisa vaka-vushunga mu ngila ya vuvi, akatsa mu mweto wendi. Oloni vaka-vushunga vakatambula cikandelela cacivwa.
11Vaka-kufuka simbu yoshe vakaliyongola ngwe vali na mana, oloni kautu uje azivisisa, namutuvakana.
12Omo vaka-vushunga vashwana, co vanu voshe valisamba, oloni omo vaka-vuvi vashwana, vanu valishandoka.
13Uje ashweka vuvi vwendi kakavezika, oloni uje alitavelavwo nakuvuseza Njambi akamuzivila mema ku mbunge.
14Navezika munu uje akomoka Shukulu Kalunga simbu yoshe, oloni uje akaluwisa mbunge yendi akakala mu tuyando.
15Mwene uje ayandesa vaka-kuutwa napu ngwe ndumba alinakwaana, nambe ngwe mbeya#28:15 MBEYA: Kenga 2 Vimyene 2:24. wa vukalu.
16Muka-kushwana wakujeneka mana akayandesa vanu manene, oloni uje kesi na muuka akayoya simbu yakama.
17Kesi ukwase munu uje muka-kutsiya, mwecele aye nakwendangana matangwa oshe akuyoya kwendi.
18Pwa munu wa kulongwa, co ukovoka, nga kuupu munu wa kulongwa, co vwasi-vwasi ukawa.
19Nga upanga na nzili, co ukakala na vyakulya vyavingi, oloni nga uviisa simbu, co ukapwa kautu.
20Njambi avezikisa vaka-kulongwa, oloni anyanyamesa voshe vaje vashaka kufuka vwasi.
21Kusompa civembulu kwapwa kwakuvi, oloni vaka-kusompa vamo vakalingi mwamuvi akutambula nameme lizika-kanwa lyalindondo.
22Vaka-muuka vashaka vwasi kufuka, kuvazivuka vuutu muvukavezila.
23Kunangula ca vushunga vacishangazala, kutuvakana majwi a civembulu.
24Woshe uje ayongola ngeci kwivila vaishe nambe vaina kesi vuvi, ikeye vene napu musamba wa muka-kunyongesa.
25Cipululu cikanenela munu tuyando, oloni uje akulaela kuli Shukulu Kalunga akakala mwamuvwa.
26Uje alikulaela ikeye vavenya napu cilema, oloni uje enda na mana akovoka.
27Uje aana vyuma ku vaka-kuutwa kakayanda embwe, oloni uje alalameka mesho endi ku vaka-kuutwa, co vanu vavangi vakamusinga.
28Omo vaka-vuvi vashwana, co vanu vashandoka, oloni omo vaka-vuvi vonwa kushwana, co vaka-vushunga vashwana lalo.
The Bible in Mbunda ©The Bible Society of Zambia, 2006