Visimo 25
25
Visimo vya Solomoni vikwavo
1Evi lalo vikevyo visimo vya Solomoni, vije vivasonekele vanalume va mu mbanja ya Mwene Hezekiya wa mu Yunda.
2Tusingimika Njambi a vyuma vije vyakushweka, tusingimika vimyene akutunungulwila vyuma vije vyakushweka.
3Kuwasa kuzivuka vije vyayongola mwene, viyongola vyendi kesi vikevyo viyongola vyetu, viyongola vya mwene vinapu ngwe akamwa ya melu nambe ngwe nzinga ya mema a kalunga.
4Siliva vanapande kuyijelesa, simbu kanda muka-kufula afule cuma cacivwa. 5Vanu vaka-vuvi vanapande kuvatundisa, simbu kanda mwene ashwane mu vushunga. 6Kesi ulimwese kupwa uwakama omo wimana ku mesho a mwene. 7#Luk 14:8-10 Cinapu cuma cacivwa nga mwene ikeye vavenya akwana mwela wa kasingimiko, kutuvakana yove kushauka ku mesho a vamyata va mwene.
8Kesi uzambwile kutwala mukweni ku mbanja. Nga mukaleo weka akawana ngeci yove u muka-mulonga, co ukaziva shwamwa yakama manene.
9Nga akati kove na mukweni ali vimata, livwaeseni yeni vavenya akati keni, co kesi mulekeko vakweni veka lalo. 10Kutewa munu woshe azivuka, co lizina lyove likashauka.
11Lijwi lyalivwa lije vendeka lalo a simbu yaivwa, linapu ngwe cimweso ca ngolinde civanatumbika mu siliva.
12Kunangula kwakuvwa kuli na seo manene kutuvakana kanzeya ka ngolinde, nambe vyakuzala vya senga vyakulinga na ngolinde yaivwa.
13Muluwa wamuvwa akasimpisa mbunge ya shukulu yendi uje namutumu, ngwe mema akutonola muwakasimpisa vimbunge vya vanu a simbu ya kuteja.
14Vanu vaje vakakulaela vwana vuje kuvesi kwana, vanapu ngwe mashelwa na lihunzi, vije kuvyesi kunena nyonzi.
15Akupwa munu wakusimpa wasa kusindiya mwene, co lijwi lyakwendeka na cizemo likamanesa vukalu.
16Nga uwana vuki lyako vwavundondo, kutewa ukutilila manene, co uvushanja. 17Kesi uyayaye ku njuvo ya mukweni kushwakumo, kutewa akakwenukwa, co akakuzinda.
18Vukaleo vwa makuli ali musamba wove, vunapu ngwe kumulwisa na moko ya mukwale, nambe na mbweti, nambe na mukili wakuvambuka.
19Musamba uje kuwasa kukulaela a simbu ya vukaleo, napu ngwe liyo lya lisinga nambe ngwe lindi lije lili na mbandu.
20Kwimbila mwaso munu ali mu vusiwa kunapu ngwe kushulula munu vuzalo vwendi a litangwa lya lisika, nambe ngwe kukwita mwongwa a mbandu.
21Nga citozi cove ali na njala, mwane vyakulya alye, nambe nga ali na lihwila, mwane mema anwe. 22#Lom 12:20 Eci cinapu ngwe kulundika manungu a tuhya a mutwe wendi, co Shukulu Kalunga akakwana cikandelela.
23Lufwe lukanena vukalu, ngwe lihunzi lya ku kunto mulikanena nyonzi.
24Mwamuvwa kukala mu cimbimbi ca njuvo yove, kutuvakana kukala mu njuvo amo na munakazi wa kanwa.
25Kuziva muzimbu wauvwa wa ku lifuti lya kulyala, kunapu ngwe munu anwa mema akutonola omo ali na lihwila.
26Omo muka-vushunga atava muka-vuvi, napu ngwe mazilo aje vanombila mu lisima lya mema amavwa.
27Kesi mwamuvwa kulya vuki vwavungi, mwamuvi lalo ku vanu kulishakezekela vulemu vakevo vavenya.
28Munu uje aluvala-luvala simbu yoshe, napu ngwe nganda ya civumbe.
The Bible in Mbunda ©The Bible Society of Zambia, 2006