Visimo 24
24
-19-
1Kesi uliveyele vaka-vuvi, nambe kulikwata navo vusamba embwe. 2Vimbunge vya vaka-vuvi viyongola lika vya lwozi, co tunwa twavo twendeka lika vya muuka.
-20-
3Njuvo vakaitungu a luvula lwa mana nakuzivisisa, 4mana anapande kushulisa milili na vufuko vwoshe vwa seo.
-21-
5Kukala na mana kunapu kwakuvwa kutuvakana kukala na nzili, eyo, mana apwa cuma ca seo manene kutuvakana kukala na nzili. 6Nga vakutwamenena mwamuvwa wasa kulwa nzita, nga vanu vavangi vakunangula wasa kuhyana nzita.
-22-
7Visimo vya mana, vyapwa vyakulova manene kuli cilema kuvizivisisa. Ikeye kesi kwendeka omo vasimutwiya vin̄anda vyakama.
-23-
8Uje atumba matumbe a vuvi, vakamutumbula muka-kunena vukalu. 9Viyongola vya vulema vyapwa vuvi. Vanu vazinda munu uje ashendumuna vakwavo.
-24-
10Nga uzeya a simbu ya vukalu, co nzili yove ipwa yaindondo.
-25-
11Amena vaje vavatwala ku kutsa, vayesa vaje vaya nakuvatsiya. 12Wasa kwendeka ngwove, “Ou kesi mulonga wange,” oloni Njambi azivuka viyongola vyove. Ikeye alinakukenga ali yove, co azivuka viyongola vyove. Co akakwana cikandelela ku vyuma vije ulinga.
-26-
13Munange, lya vuki omwo vwapwa vwavuvwa. Vuki vwakundweka mu ngenga, vupwelelela mu kanwa kove. 14Unapande kuzivuka ngeci mukemwo muwanafu mana ku mwonyo wove. Nga ukala na mana, co cinyangavili cove kucikahu.
-27-
15Kesi upwe ngwe vaka-vuvi vaje vavandamena ku njuvo ya muka-vushunga nakumulwisa, nakwambata vivala vyendi. 16Nameme muka-vushunga awa visimbu vitanu na vivali, akatukamo lalo, oloni vaka-vuvi tuyando tukavanyongesa.
-28-
17Kesi uvwaelele omo citozi cove ali mu vukalu, co lalo kesi ujolele omo citozi cove atanuka. 18Kutewa Shukulu Kalunga acimona, co aluvala, co kakamunyanyamesa.
-29-
19Kesi ulishoshomwene omwo vaka-kulinga vuvi, nambe kuliveyelavo. 20Simbu yaindondo lika vaka-vuvi vaziluka ngwe mulangi wa ndeya ije izima.
-30-
21Munange, singimika Shukulu Kalunga, nakusingimika lalo mwene. Kesi ulipandakane na vanu vaje vaka-kuvatengulukila, 22omwo vwasi-vwasi vukalu vukaija a vanu vangacije. Kuma iyajo azivuka tuyando tuje Njambi nambe mwene anena?
Visimo vikwavo lalo vya mana
23Evi lalo vikevyo visimo vya vaka-mana.
Kusompela vulemu kunapu kwakuvi, 24woshe uje asambesa muka-mulonga, vanu voshe vakamusinga nakumuzinda. 25Oloni vaje vahisa muka-mulonga, vakavwaelela, co vakakala na vivezikiso.
26Kukumbulula kwa kulongwa kunapu cimweso ca vusamba vwa vushunga.
27Akulivanga vwaesa mahya ove, asinoni utunge njuvo yove.
28Kesi upwe mukaleo wakulwisa mukweni wakujeneka mulonga, nambe kwendeka vyuma vyakutanganesa ali ikeye. 29Kesi wendeke ngwove, “Njikalinga kuli ikeye ngwe mwanjilingile!”
30Njetile ku lihya lya cilema wa mulwa, na ku citungu cendi ca mikolovozi ya vushuka vwa vinyu. 31Mu lihya lyendi mwamenene mutiva-ntumbi, na shaku. Co civumbe ca mamanya casiwukile. 32Omo njakengele cuma eci, njaciyongwele, co njalilongeseleleo, 33nga wendeka ngwove, “Njicitumbameko, nakulalako kamandondo, nakwetekako mavoko ange mukuhwimako kasimbu lika.” 34#Vis 6:10-11 Vuutu vukakulwisa ngwe mwizi uje ali na vitwa.
The Bible in Mbunda ©The Bible Society of Zambia, 2006