Visimo 21
21
1Mbunge ya mwene yakala mu livoko lya Shukulu Kalunga, akayendesa ngwe muje mwakendesa mema a mu muta.
2Vingila vya munu vyoshe vinapu vyakushungama ku mesho endi, oloni Shukulu Kalunga ikeye asompa vilinga.
3Kulinga vushunga na vuvwa kuli na seo manene kuli Shukulu Kalunga, kutuvakana n̄ombelo.
4Vaka-vuvi valyalesa nakulyaka ku vukama, oloni evi vinapu vuvi.
5Matumbe a munu uje apanga na nzili amunenela vyuma vyavingi, oloni vaje vazambula kuviwana vapwa lika tuutu.
6Vufuko vwakuwana mu ngila ya makuli vunapu ngwe mbundu ije ikakumukila noku-noku, vunapu mweto wauvi.
7Lwozi lwa vaka-vuvi lukavanyongesa, omwo vanavyana kulinga vya vushunga.
8Ngila ya muka-milonga yapwa ya kupenga-penga, oloni vilinga vya muka-kulongwa vyapwa vyavivwa.
9Mwamuvwa kukala mu cimbimbi ca njuvo yove, kutuvakana kukala mu njuvo amo na munakazi wa kanwa.
10Vaka-vuvi simbu yoshe vakashungwiya vuvi, kuvesi kuzivila vasamba vavo mema ku mbunge.
11Omo muka-kuyeluwisa atambula cihiso cendi, co cilema alilongeselao, munu wa mana atolilila ku vije vamunangula.
12Njambi wapwa muka-vushunga, ikeye lika azivuka vije vilingiwa mu vinjuvo vya vaka-vuvi, co akavanyongesa.
13Uje avyana kukwasa muka-kuutwa, nendi lalo kuvakamutolilila omo akatambeka ngeci vamukwase.
14Nga munu umo aluvala nove, co lizika-kanwa lyakwana mukushwekesa likamwolwesa.
15Omo kusompa kwa vushunga kulingiwa, co vaka-vushunga vavwaelela, oloni vaka-vuvi valishoshomwena.
16Nga munu avyana kupangesa mana amavwa, akaliwana ikeye vavenya mu mbumbo.
17Uje ashaka vyuma vya senga akayanda, uje azema vinyu nakulya vya mazi kakafuku.
18Vaka-vuvi vakapwa nomo yakukula vaka-vushunga, co vaka-kujeneka kukulaela vakapwa nomo yakukula vaka-vushunga.
19Mwamuvwa kukala mu mambo, kutuvakana kukala na munakazi wa kanwa nakulinyenyeta.
20Vaka-mana vakakala na vufuko vwa seo yakama, oloni vilema vashandola vimbongo vyavo vwasi omo vaviwana.
21Munu uje alinga vushunga na ngozi, akawana mwonyo, na vushunga na kasingimiko.
22Munu muka-mana, asa kufungulula nganda ije ili na mashwalale nakusiwula vivumbe vyayo.
23Nga unyunga majwi aje ukendeka, co ulinakwamena mwonyo wove ku vukalu vwavungi.
24Munu wa kulyalesa nakulyaka ku vukama ikeye muka-kushendumuna, alinga mukulyaka ku vukama na kulyalesa.
25Muka-vulwa uje avyana kupanga, alinakulitsiya lika ikeye vavenya, 26vaka-vuvi valiveya litangwa lyoshe lyamutunu, oloni vaka-vushunga vakana vyuma vyavo kuvesi kulikela.
27Shukulu Kalunga wazinda vin̄ombelo vya vaka-vuvi, vaje vamukombelela na matumbe a vuvi.
28Mukaleo wa makuli kesi wakukulaela, oloni lijwi lya mukaleo wa vushunga vasa kulitava.
29Vaka-vushunga vakayongola mwamuvwa a vingila vyavo, oloni vaka-vuvi vakaliyongola kupwa vavavwa.
30Mana a vunu nakunyanyama nakuzivuka, kuvikwasa nga Shukulu Kalunga nakuvyana.
31Wasa kutwala tuvalu ku nzita, oloni Shukulu Kalunga ikeye muka-kuhyanesa.
The Bible in Mbunda ©The Bible Society of Zambia, 2006