Visimo 20
20
1Cinapu cuma ca vulema kunwa vinyu, nakupenda kunena kalwa, vaka-kupenda vinyu kuvesi na mana.
2Vukalu vwa mwene vunafu ngwe kwaana kwa ndumba, ou amushangumuna avulumuna mwonyo wendi.
3Capwa kasingimiko ku munu kulyenga ku lwozi, oloni vilema vashaka kulinga vimata.
4Mulwa uje kalimi mahya endi a simbu yakulima, kakateje nacimo cai.
5Viyongola vya mu mbunge ya munu vinafu ngwe mema a mu lisima lyakulova, kuvanga uje azivuka lika ikeye asa kuwatekula.
6Vanu vavangi vakalitumbula vakevo vavenya kupwa va kulongwa, oloni munu wa vushunga iyajo asa kumuwana?
7Munu muka-vushunga akende mu vushunga, vavezika vanike vaje vamutembunwina.
8Omo mwene asompa vin̄anda, co avyeseka na vukaleo vwa vije vin̄anda.
9Iyajo asa kwendeka ngwendi, “Viyongola vyange vyapwa vyakujela, njinajele ku vuvi vwange?”
10Shukulu Kalunga wazinda vanu vaje vapangesa vulemu vwa makuli vwa vipeseleso na viseteko vya makuli.
11Vilinga vyavivwa nambe vilinga vyavivi vije vyalinga mwanike, visholola cifwa ca uje mwanike.
12Mesho akumwesa na matwi akutolililisa, vinapu vwana vwakutunda kuli Shukulu Kalunga.
13Nga uzema kulala tulo, ukayanda na njala, nga winduka nakupanga, co ukakala na vyakulya vyavingi.
14Vaka-kulanda simbu yoshe vakalinyenge manene akulonda kwa vindando, oloni mamaneselelo aya na kulyalesa na vyuma vije vyanalanda.
15Majwi a mana anatuvakana ngolinde nambe mamanya a seo yakama.
16Vanapande kukutambula cikoveyo cove nga wacanene kupwa kapopo ku mulonga wa mungenzi.
17Vyakulya vyakuwana mu ngila ya makuli vyapwa vyavivwa kuvilya, oloni mamaneselelo avyo vishautuka mu kanwa ngwe livu.
18Tambula kunangula kwakuvwa simbu kanda utumbe vutumbe, kesi uye ku nzita nga kuwesi na vutumbe.
19Muka-vishaki kasa kunyunga vyakushwekesa, ngecivene, kesi ulizilile nendi.
20Nga usinga visemi vove, co mwonyo wove ukahwa ngwe ndeya yakuzima omo simbu yove kanda yete.
21Vufuko vwakuwana vwasi-vwasi vwasa kukupwila cisingo.
22Kesi ulilingile shambandinga a vuvi. Kulaela lika kuli Shukulu Kalunga, co akakwamena.
23Vulemu vwa vipeseleso vya makuli, na vipeseleso vya makuli vyapwa vya vunyengwe ku mesho a Shukulu Kalunga.
24Kwenda kwa munu kwakala kuli Shukulu Kalunga, vatijo munu asa kuzivuka ngila yendi?
25Simbu kanda ukulaese kwana Njambi n̄ombelo, yongolao mwamuvwa, amo ukavyana kuyana.
26Mwene muka-mana akanyanyamesa woshe uje alinga vuvi, kujeneka kumuzivilako mema ku mbunge.
27Munzinzime wa munu unapu ndeya ya Shukulu Kalunga, umona vyoshe vyakushweka vili mu mbunge ya munu.
28Mwene akala a litanda simbu yakama nga ashwana mu kulongwa, na vushunga na ngozi.
29Vumpau vwa vakwenje vukevwo nzili yavo, oloni vuvwa vwa tukulukazi, vunapu kutoka vwele.
30Mikiki ya vivanzi ijelesa vuvi, nakupupa lalo kutundisa vuvi mukati ka munu.
The Bible in Mbunda ©The Bible Society of Zambia, 2006