Visimo 22
22
1Lutsimo lwaluvwa na kasingimiko, vili na seo kutuvakana siliva na ngolinde.
2Muka-kufuka na kautu voshe vanafu mumolika, Shukulu Kalunga ikeye wavatangele.
3Omo vaka-mana vamona vukalu vwija, co vatewa, oloni muka-kujeneka mana ayako, co akalikovelesa mu vukalu.
4Ononoka Shukulu Kalunga, pwa muka-kulikeesa, co ukawana vufuko, na kasingimiko nakuyoya simbu yakama.
5Vilema vakende mu ngila ije ili na mambimbo, oloni nga uzema mwonyo wove tunda ku myeto ije ili mu ngila ya vaka-vuvi.
6Longesa mwanike ngila ije mwanapande kwendela, co omo nakolo kakatundumo.
7Tuutu vakavashwana kuli vaka-kufuka, vaje voshe vakumuna vapwa vindungo va vaka-kukumwisa.
8Uje akuva vuvi akateja tuyando, co kuluvala manene kwa vaka-vuvi kukahwa.
9Munu muka-mema ku mbunge akavezika, omwo alinakwana vyakulya vyendi ku tuutu.
10Nga usheka vaje vashendumuna vakwavo, kulijokota na lwozi vikahwa.
11Uje azema kukala na mbunge yakujela, co endeka vya ngozi, mwene akapwa musamba wendi.
12Mesho a Shukulu Kalunga akamono muka-mana, oloni anyongesa majwi a muka-makuli.
13Muka-vulwa atumbama mu njuvo endeka ngwendi, “Nga njituuka anja nakuya ku vipangi ndumba anjikwata.”
14Vupangala na munakazi wambala vunapu ngwe mbulu yakulova, nga uluvalesa Shukulu Kalunga, co ukawilamo.
15Vulema vukasata mu vimbunge vya vanike, oloni kuvapupanga vivanzi vyakuvalongesa, co civutundisamo.
16Nga wana vwana kuli vaka-kufuka, nambe kuyandesa tuutu ngeci ufuke, ukapwa lika u kautu yove vavenya.
Visimo vya mana vyakupwa makumi atatu
17Tolilila njikulongese visimutwiya vya vaka-mana. Lilongese vilongesa vyavo, 18co ukavwaelela nga uvyanuka nakuvinyunga. 19Njikulongesa lelo, ngeci ukulaele kuli Shukulu Kalunga. 20Yange njakusonekela visimutwiya vyakupwa makumi atatu. Visimutwiya evi vinapu vya mana, co lalo vyasa kukunangula mwamuvwa, 21nakukulongesa muvwafwa vushunga. Omo vakutuma kukashakezeka vushunga, co ukanena kukumbulula kwakuvwa.
-1-
22Kesi unyanyamene tuutu, nambe kuvakwisa omo vali mu mbanja. 23Omwo Shukulu Kalunga ikeye muka-kuvalwila, co vyoshe vije ulinga kuli vakevo, Shukulu Kalunga akavilinga lalo kuli yove.
-2-
24Kesi ulikwate vusamba na vanu vaka-kuluvala-luvala vwasi, nambe kwenda amo na munu muka-litoto.
25Kutewa ukalilongesa vilinga vyavo, co ukonwa kutenguluka.
-3-
26Kesi ukulaese kufwetela munu mulonga. 27Nga unonwa kufweta, co vakambata nambe vulili vwove.
-4-
28Kesi ukashwenyese cimweso ca nginga yalaja ije ivatwile vakukulwila vove.
-5-
29Nga upanga vipangi vyove mwamuvwa, co ukapangela vimyene, kuukapangela vanu vangoco embwe.
The Bible in Mbunda ©The Bible Society of Zambia, 2006