Visimo 19
19
1Muka-kuutwa uje enda mu vushunga alikulutwe kutuvakana muka-makuli, ikeye lalo cilema.
2Kesi mwamuvwa kukala na ntwima mu mbunge kukala na mana, nambe kuzambula manene uzimbalesa ngila.
3Vanu vamo vakaliviisa vakevo vavenya na vilinga vyavo vya vulema, co kutundao valuvalela Shukulu Kalunga.
4Vaka-kufuka vali na vasamba vavangi, oloni tuutu kuvesi na vasamba.
5Mukaleo wa makuli akawana cihiso, na uje endeka makuli vakamunyanyamesa.
6Vanu vavangi vakashaka kupwa vasamba va vanu vaje vasa kuvakwasa.
7Nga u kautu vavushoko vove vakuzinda, vasamba vove vakuzinda manene-nene, kuuvawana nameme nga uvashakezeka.
8Uje atonda mana azema mwonyo wendi, uje anyunga mana co akakala mwamuvwa.
9Mukaleo wa makuli akawana cihiso, na uje endeka makuli akanyonga.
10Cilema kapandele kukala na vufuko, nambe ndungo kapandele kushwana mu mwela wa mwene.
11Nga u muka-mana usimpa mukuluvala kwove, omwo mukweni akuviisila unapande kumusambesa.
12Kuluvala kwa mwene kwafwa ngwe kwaana kwa ndumba, oloni cizemo cendi cafwa ngwe nyonzi ya musanda.
13Mwana wakweeva azivisa shwamwa ishe. Munakazi wa kanwa napu ngwe kundweka kwa mema a nyonzi ya mungole.
14Munu asa kushwana njuvo na vufuko vwa visemi vendi, oloni Shukulu Kalunga lika asa kukwana munakazi wa mana.
15Vulwa vwasa kulalesa munu tulo twakama, munu wa cifwa eci akayanda na njala.
16Uje anyunga mashiko a Njambi, akayoya oloni uje avyana kwononoka mashiko endi akatsa.
17Uje akala na ngozi na tuutu alinakukumwisa Shukulu Kalunga, co Shukulu Kalunga akamwana cikandelela a vije vyanalingi.
18Longesa munove simbu acili mwanike ngeci alilongese, nga kuumupupu, co umwecelela ngeci anyonge.
19Munu wakuluvala-luvala manene wakala mu vukalu vwakama, munu wa cifwa cangacije vanapande kumukwasa simbu yoshe.
20Nga utolilila ku vije vakunangula, nakukala na cizango cakulilongesa, co ukapwa muka-mana.
21Yetu vanu tukatumbu matumbe amangi, oloni Shukulu Kalunga lika ikeye alinga vije vyanayongola.
22Kulongwa kukekwo vashaka muli munu, mwamuvwa kupwa kautu, kutuvakana kupwa munu wa makuli.
23Kukomoka Shukulu Kalunga kunena mwonyo wa vushunga, uje alingamo akahwima mwamuvwa kujeneka lyova lya vushonde.
24Vanu vamo vakala na vulwa mukwaka vyakulya mu kanwa.
25Nyanyamesa muka-kulyalesa, co cilema alilongeselao, nga u muka-mana, ukatolilila ku vije vakunangula.
26Mwana uje alinga lwozi na ishe, nakusheka vaina a njuvo wapwa mwana wakuzivisa shwamwa nakushawisa.
27Munange, nga ulikela kulilongesa, wivala vije walilongesele laja.
28Mukaleo wa makuli akayeluwisa kusompa kwa vushunga, vaka-vuvi vazema kulinga vuvi.
29Vilema voshe vakavahisa, nakuvapupa vivanzi a myongo yavo.
The Bible in Mbunda ©The Bible Society of Zambia, 2006