Visimo 18
18
1Vanu vakujeneka kulizilila na vakwavo vakashaka lika kulinga mwaya cizango cavo, vakavyana vushunga vuje vuvazivuka vakwavo.
2Cilema kesi na mulonga nambe nga azivisisa cuma nambe nga kacizivisisa, oloni ikeye akashaka lika kumwesa viyongola vyendi.
3Kulinga vuvi kunena shwamwa nakukuyeluwisa.
4Majwi a munu wa mana anapu ngwe mema akutunda ku kavwelu-vwelu kakulova.
5Kesi mwamuvwa kusingimika muka-mulonga, nambe kuvindika munu wa mulonga ngeci kesi awane vuvwa.
6Omo cilema ashangumuka vimata, co ashangumuna lwozi.
7Omo cilema endeka aliviisa ikeye vavenya, endekesi yendi inapu nganjo yakulitela ikeye vavenya.
8Majwi a muka-kufweya anapu ngwe vyakulya vyakutovala, akakovela mwimo.
9Muka-kupanga vipangi vyendi na vulwa, napu kavushoko ka munu muka-kushangumuna vukalu.
10Shukulu Kalunga wapwa cimpaka ca nzili, muka-vushunga atewelako, co akovoka.
11Vaka-kufuka vakayongola ngeci, vufuko vwavo vwasa kuvanyunga ngwe civumbe cacilaja cakukola cakuzengeleka nganda.
12Kulyalesa kutwala kukunyonga, kulikeesa kutwala ku kasingimiko.
13Akulivanga tolilila simbu kanda ukumbulule, nga ukumbulula omo kanda uzivisise ulikokela lika shwamwa na vulema.
14Mbunge yove inapande kusimpa omo uvinja, oloni nacimo cai cikwasa nga mbunge yove izeya.
15Vaka-mana vali na cishota-mbunge cakuzivuka mana, co matwi a vaka-kunyanyama ashaka mana.
16Yove ushaka kuwana mwela ku munu wa vulemu ndi? Mutwalele vwana, co cikapwa cacasi kulizilila nendi.
17N̄anda ya munu wakulivanga kwendeka mu mbanja, simbu yoshe yapwa ngwe ya vushunga kuvanga noo muka-kumulwisa naija nakumwihula vihula.
18Nga vanu vavali valinga vimata mu mbanja, co akuta n̄ela vimata vyavo vihwa.
19Kukwasa ndolome yove kunapu ngwe nganda yakukola, oloni kulijokota kunapu ngwe tupateso twa ku njuvo.
20Majwi ove apwe amavwa, nga ulingamo, co ukamona ngeci unalingi cuma cacivwa.
21Vyendeka vyove vyasa kukuyoyesa nambe kukutsiisa, co unapande kunyunga majwi aje wendeka.
22Uje awana munakazi awana cuma cacivwa, co awana kutetela kuli Shukulu Kalunga.
23Omo kautu endeka alikeesa, oloni omo fuki akumbulula, majwi endi apwa akushaula.
24Munu wa vasamba vavangi alinyongesa ikeye vavenya, oloni musamba wa vushunga wa a mbunge natuvakana kavushoko.
The Bible in Mbunda ©The Bible Society of Zambia, 2006