Visimo 17
17
1Mwamuvwa kulya livanda lyakuma lya likende mu kwoloka, kutuvakana kukala na ciwano mu njuvo muje muli lwozi.
2Ngamba wa mana akashika mwana uje azivisa shwamwa, ngamba wa cifwa cangacije akatambula vushwana amolika na mwana wa shukulu yendi.
3Ngolinde na siliva vakavyeseka na tuhya, oloni Shukulu Kalunga akeseka viyongola vya munu.
4Vaka-vuvi vakatolilila ku viyongola vya vuvi, co vaka-makuli vakatolilila ku makuli lalo.
5Uje ashendumuna tuutu alinakushaula Njambi uje wavatangele, uje avwaelela a tuyando twa vakwavo vakamuhisa.
6Tukulukazi vakalyalesa ali vatekulyavo, vana lalo vanapande kulyalesa ali visemi vavo.
7Vaka-vulemu kuvesi kwendeka makuli, co cilema kesi na cuma cimo cacivwa cakwendeka.
8Vanu vamo vayongola ngeci lizika-kanwa likapanga ngwe manseno, co vakulaela ngeci lyasa kupanga cuma cimo.
9Nga ushaka vanu vakuzeme vasambese omo vakuviisila, kwanuka-anuka milonga ikutsiisa vusamba.
10Munu muka-mana asa kuziva akumwendekela lumolika, oloni cilema kasa kuziva kumwendekela nambe kumupupa visimbu vyakupwa 100.
11Kutsa kwija ngwe muluwa wa ngozi ku vaka-vuvi vaje simbu yoshe vashangumuna vukalu.
12Cili kulutwe kuliwana na ndumba ivananyeka vana vendi, kutuvakana kuliwana na cilema alinga vya vulema vwendi.
13Nga wilwisila vyavivi ku vyavivwa, co vuvi kuvukatundu mu njuvo yove.
14Kushangumuka vimata kunapu ngwe mema azikuka mu lishali, ngecivene, likele kushangumuka vimata simbu kanda lwozi lushangumuke.
15Uje asambesa muka-vuvi na uje ahisa muka-vushunga, voshe muvuvali vwavo vanapu vunyengwe kuli Shukulu Kalunga.
16Omwo vikajo vilema vali na vimbongo vije vasa kulikwasa navyo mukulilongesa, oloni vakevo kuvesi na mana?
17Vasamba vamwesa cizemo cavo simbu yoshe, vavushoko vanasemukila ngeci vamwene amo tuyando.
18Kuvanga munu wakujeneka mana lika ikeye akulaesa kwana kapopo ku likongo lya mukwavo.
19Kuzema vuvi kunapu kuzema tuyando, nga simbu yoshe ulyalesa ulikokela lika tuyando.
20Munu wakulindwa mbunge kesi kuwana vyavivwa, muka-kwendeka makuli alikokela lika tuyando ikeye vavenya.
21Kukita mwana wakweeva, kunenesa visemi vendi kulinyenga nakujeneka kuvwaelela.
22Mbunge yakuvwaelela ikangwisa muvila, oloni mbunge yakulinyenga simbu yoshe iyondwesa muvila.
23Maako vavavi vakatambula mazika-kanwa mu vuse-vuse, ngeci vaengese n̄anda.
24Muka-mana mesho endi ali ku vyuma vya mana, oloni mesho a cilema akenga ku vyuma vyangoco.
25Mwana wa cilema akazivisa shwamwa ishe, nakunenela vaina vakumukita vusiwa.
26Kesi mwamuvwa kuhisa munu wakujeneka mulonga, nambe kupupa vaka-vushunga omwo vushunga vwavo.
27Uje anyunga majwi endi ali na mana, na munu uje azivuka mwamuvwa vyuma akasimpi.
28Nameme cilema nga noloka kuluu, vamutumbula wakunyanyama na muka-mana.
The Bible in Mbunda ©The Bible Society of Zambia, 2006