Visimo 16
16
1Yetu vanu tukatumbu matumbe, oloni lijwi lya mamaneselelo lyapwa lya Njambi.
2Twasa kusinganyeka ngeci yetu tuzivuka vika vinapu vya vushunga, oloni Shukulu Kalunga apeselesa viyongola vyetu.
3Kundika matumbe ove kuli Shukulu Kalunga, co ukavezika mukuya kulutwe.
4Cuma coshe catangele Shukulu Kalunga, cili na vutumbe vwaco, co vutumbe vwa vaka-vuvi vunapu kunyonga.
5Shukulu Kalunga wazinda munu woshe uje muka-kulyalesa, mwa vushunga vene akavahisa.
6Pwa wa kulongwa nakushungama, co Njambi akakusambesa ku vuvi vwove, ononoka Shukulu Kalunga, co cuma nacimo cai cacivi cikalingiwa kuli yove.
7Omo uvwaelelesa Shukulu Kalunga, nameme vitozi vove vapwa vasamba.
8Mwamuvwa kukala na vyuma vyavindondo viwatambula na kulongwa, kutuvakana kukala na vyuma vyavingi viwatambula kwakujeneka kulongwa.
9Wasa kutumba matumbe ove, oloni Njambi ikeye atwamenena vilinga vyove.
10Mwene endeka na moko ya vuNjambi, co kusompa kwendi kwapwa kwakushungama simbu yoshe.
11Shukulu Kalunga ashaka kupeselesa nakweseka kupwe kwa vushunga, ndando yoshe lalo inapande kupwa yaivwa.
12Cinapu ca vunyengwe ku vimyene kulinga vyuma vyavivi, omwo litanda lya vumwene lyapwa lya vushunga.
13Mwene washaka kuziva vushunga, nakushangazala vaje vavwendeka.
14Munu wa mana avwaelelesa mwene, nga mwene aluvala, co munu umo atsa.
15Omo mwene ajolela nakuvwaelela nove, cinapu ngwe mashelwa a nyonzi ya nyangao, co uyoya.
16Cinapu cuma cacivwa manene kukala nakuzivisisa na mana, kutuvakana kukala na ngolinde na siliva.
17Ngila ya vaka-vushunga ikeyo kutewa vuvi, ngecivene, uje anyunga ngila yendi anyunga mwonyo wendi.
18Kulyalesa manene kutwala munu kukunyonga.
19Mwamuvwa kulikeesa nakupwa u kautu, kutuvakana kulyalesa, nakupwa ufuki, nakwambata vyuma vyakupukula.
20Aka mbunge ku vije vivakulongesele, co ukavezika, kulaela kuli Shukulu Kalunga, co ukavwaelela.
21Muka-mbunge ya mana vakamuzivukila akuzivisisa kwendi, vanu vamuzivisisa omwo kuvwaa kwa majwi endi.
22Mana apwa lisima lya mwonyo kuli muka-mana, oloni kulongesa vilema kwapwa kuviisa lika simbu.
23Vaka-mana vakasinganyeka simbu kanda vendeke, vije vendeka vyapwa vyakuzivisisa manene.
24Majwi amavwa anafu ngwe vuki, akuvwaelelesa nakukupwisa munu wa nzili.
25 #
Vis 14:12
Kuli ngila ije amona munu ngeci inapu ya vushunga, oloni mamaneselelo ayo inapu ngila ya kutsa.
26Munu wa lilaku-laku lya vyakulya, limuundanganesa manene omwo ikeye ashaka kukuta.
27Vaka-vuvi vakatumbu matumbe a vukalu, nameme majwi avo enyeka ngwe tuhya twa milangi.
28Vaka-vuvi vakashandola lufwe, co vashangumuna tuyando nakutsiya vusamba.
29Vaka-lwozi vakashongangeya vakwavo, nakuvatwala mu ngila yaivi.
30Nyanyama na vanu vaje vakunyateya na mesho nakushongomona tunwa twavo, valinakuyongola vyavivi.
31Vwele vunapu cilongo ca vumpau, cije vanazala vanu vaje vanakala nakuyoya mu vushunga.
32Muka-kujeneka kuluvala-luvala wapwa wamuvwa manene kutuvakana muka-nzili, kulinyunga yove vavenya kwapwa kwakuvwa kutuvakana kushwana vinganda vyoshe.
33Vanu vakate n̄ela ngeci vawane cizango ca Njambi, oloni Njambi ikeye muka-kutava vije vinapande kulingiwa.
The Bible in Mbunda ©The Bible Society of Zambia, 2006