Visimo 15
15
1Kukumbulula kwakuvwa kwolwesa vukalu, oloni lijwi lyakuvavalesa mbunge, lishangumuna vukalu.
2Omo vaka-mana vendeka, vendeka mana, oloni vilema vendeka vyangoco.
3Mesho a Shukulu Kalunga ali kwoshe-ikwoshe. Ikeye alinakukenga ali vaka-vuvi, na ali vaka-vushunga.
4Majwi a ngozi apwa cemba cacivwa, oloni majwi a vukalu, akavavalesa ku mbunge.
5Cinapu vulema kwombwanesa vije vyakulongesa isho, oloni cinapu cuma cacivwa kunyunga kunangula kwendi.
6Vaka-vushunga vakanyungu vufuko vwavo, oloni vaka-vuvi vakazimbalesa vufuko vwavo, omo simbu yaikalu yeta.
7Majwi a vaka-mana ashandola mana, oloni vikuyongola kwa vilema kesi kwa mana embwe.
8Shukulu Kalunga akazivi vunyengwe na vin̄ombelo vya vaka-vuvi, oloni avwaelela na malombelo a vaka-vushunga.
9Shukulu Kalunga akazivi vunyengwe a vingila vya vaka-vuvi, oloni wazema vanu vaje valinga vya vushunga.
10Nga ulinga vya kupenga-penga, co vakakuhisa manene, nga kuutava kukunangula, co ukatsa.
11Nambe vukalo vwa vatsi, kuvwasa kuvindika Shukulu Kalunga kuzivuka vije vilimo, co munu asa kushweka vatijo viyongola vyendi ku mesho a Njambi?
12Vaka-kulyalesa kuvesi kushaka kuvanangula, co kuvesi lalo kulomba kuvanangula kuli vaje vakunyanyama.
13Omo vanu vanavwaelela, co vajola-jola, oloni omo vaviilila, co vazeya.
14Vihwanga vakashaka kulilongesa, oloni vilema vanapwisamo na vulema vwavo.
15Kuyoya kwa kautu, simbu yoshe kwapwa kwa kayando, oloni vanu vakuvwaelela, simbu yoshe vajolela mukuyoya kwavo.
16Mwamuvwa kupwa u kautu oku ukomoka Shukulu Kalunga, kutuvakana kupwa u muka-kufuka, nakukala mu tuyando.
17Mwamuvwa kulisa visapa-sapa ku njuvo kuje kuli cizemo, kutuvakana kulisa situ ya mazi ku njuvo kuje kuli cizindo.
18Mbunge ya matoto ikashangumuna vimata, oloni kusimpa, kukanene kwoloka.
19Nga u mulwa, co ukawana vukalu mukuyoya kwove, oloni nga u wa kulongwa, co kuukayanda.
20Mwana uje wa mana avwaelelesa ishe, oloni mwana wakweeva, akolesa vaina shwamwa.
21Vilema vavwaelela na vulema vwavo, oloni vaka-mana, vakalingi vyuma vya vushunga.
22A kunangula kwakuvwa vyuma vikaviya, oloni nga kuli munga ya vaka-kunangula, vyuma vikavwaa.
23Kukumbulula cihula a simbu yaivwa, kunenela vanu kuvwaelela.
24Vanu vakunyanyama vakende mu ngila ije yakushungama itwala ku mwonyo, oloni kesi ngila ije ishelumuka ku vukalo vwa vatsi.
25Shukulu Kalunga akanyongesa vinjuvo vya vanu va kulyalesa, oloni akanyunga vufuko vwa vifwile.
26Shukulu Kalunga wazinda viyongola vya vuvi, oloni akavwaelela na majwi a vaka-kujela mu vimbunge.
27Muka-cipululu akanene vukalu ku naanga yendi, oloni uje azinda lizika-kanwa, akayoya.
28Vaka-vushunga vakayongola akulivanga simbu kanda vakumbulule, oloni vaka-vuvi vakazambula kukumbulula, co vakalikovelesa mu vukalu.
29Omo vaka-vushunga valombela, Shukulu Kalunga avatolilila, oloni kesi kutolilila ku malombelo a vaka-vuvi.
30Cihanga cakujola-jola, civwaelelesa mbunge, na muzimbu wauvwa, ukolesa muvila.
31Nga utolilila omo vakunangula, co ukapwa muka-kunyanyama.
32Nga uvyana kulilongesa, ulinakuliyeluwisa lika yove vavenya, oloni nga utava kukunangula, co ukapwa muka-kunyanyama.
33Kukomoka Shukulu Kalunga, kulongesa munu mana, akulivanga unapande kulikeesa, asinoni uwane kasingimiko.
The Bible in Mbunda ©The Bible Society of Zambia, 2006