Visimo 14
14
1Munakazi wa mana, anyunga njuvo yendi, oloni munakazi wa cilema, aviisa njuvo yendi.
2Woshe uje ayoya kuyoya kwakuvwa, amwesa ngeci alinakwononoka Shukulu Kalunga, oloni woshe uje ayoya kuyoya kwa kupenga-penga, amwesa ngeci alinakuyengula Shukulu Kalunga.
3Cilema wa kulyalesa vamuhisa akwendeka vya vulema, oloni majwi a muka-mana amunyunga ikeye vavenya.
4Kujeneka vingombe vakulima, mu cishete mukala mwamupulungwa, oloni nga ukala navo, co cishete cove cikashula na vimbuto.
5Mukaleo wa kulongwa simbu yoshe akendeka vushunga, oloni mukaleo uje wakujeneka kulongwa, kesi kwendeka vya vushunga oloni makuli lika.
6Vanu vaka-kulyalesa kuvasa kupwa vaka-mana, oloni cacasi kuli vihwanga kulilongesa.
7Tunda ku vilema, omwo kuvesi na cuma ca mana civakakulongesa.
8Omwo vikajo munu wakunyanyama ali na mana? Omwo azivuka vije vyanapande kulinga. Omwo vikajo cilema wapwa cilema? Omwo akayongola ngeci azivuka vyuma.
9Vilema kuvesi na mulonga nga vavulumuna, oloni vanu vavavwa vakashaka kuvasambesa.
10Mbunge na mbunge izivuka vukalu vwayo, co naumo wai asa kuvwaelela nayo.
11Njuvo ya muka-vuvi ikanyonga, oloni mbalaka ya muka-vushunga ikakola mbe.
12 #
Vis 16:25
Kuli ngila ije amona munu ngeci inapu ngila ya vushunga, oloni mamaneselelo ayo inapu ngila ya kutsa.
13Kujolela casa kufwika kuviilila, co lalo kuvwaelela casa kwimuka kuviilila.
14Vanu vavavi, vakawana vije vinavapande, vanu vavavwa, vakatambula cikandelela a vilinga vyavo vyavivwa.
15Cilema akatava cuma coshe-icoshe cije aziva, vaka-mana vakevo vazivuka kuje kuvaya.
16Vaka-mana vakalinyungu ku vukalu, oloni vilema vapwa valishamena, co vakalingi vyuma kuviyongola.
17Vanu vaka-kuluvala, vakalingi vyuma vya vulema, oloni vaka-mana vakakala mu kwoloka.
18Vilema vakawana vya vulema vwavo, oloni vaka-kunyanyama, vakatambula cikandelela ca mana.
19Vaka-vuvi vakatsikama, nakulamba kuli vaka-vushunga na kulikeesa, mukulomba kutetela kwavo.
20Nga u kautu, kuukala na vasamba, oloni nga u muka-kufuka, ukala na vasamba vavangi.
21Nga ushaka vivezikiso, kala na ngozi kuli muka-kuutwa, capwa vuvi kuyeluwisa vakweni.
22Vakweni vakakukulaela nakukusingimika nga upanga mwamuvwa, oloni nga upanga mwamuvi, co ulinakulinga mulonga.
23Kuundangana manene uwanao vimo, oloni kwendeka ngoco lika na kanwa, kutwala lika ku vuutu.
24Vaka-mana vakatambula cikandelela ca vufuko, oloni vilema vakavazivukila a vulema vwavo.
25Mukaleo wa vushunga akamena myonyo ya vanu, oloni mukaleo wa makuli, kuvamukulaela embwe.
26Kukomoka Shukulu Kalunga mwakala kukulaela, nakukolesa kuli munu na naanga yendi.
27Kukomoka Shukulu Kalunga kunapu kavwelu-vwelu ka mwonyo, ngeci munu atunde mu vinganjo vya kutsa.
28Vukama vwa mwene, vuli a vungi vwa vanu vaje vashwana, nga kesi na vanu vavangi, vumwene vwendi vuzeya.
29Uje kesi kuluvala vwasi, ali na mana akama, oloni muka-mbunge ya vwasi-vwasi, akamwesa lika vulema vwendi.
30Mbunge ya kwoloka inena vukangule mu muvila, oloni cipululu capwa ngwe mbandu ya mukongo.
31Nga uyandesa vanu vakuutwa, co ulinakushaula Njambi uje wavatangele, oloni nga uzivila ngozi tuutu, ulinakumusingimika.
32Vaka-vuvi vakaliwisa vakevo vavenya a vilinga vyavo vya vuvi, oloni vaka-vushunga vali noku kwakutewela a kutsa kwavo.
33Kunyanyama kwakala ku munu uje ali na mana, oloni vilema kuvazivuka vya mana.
34Vushunga vukatsimanesa lifuti, oloni vuvi vunena shwamwa ku lifuti lyoshe.
35Vimyene vakavwaelela na vamyata va kulongwa, oloni vakahisa vamyata vaje valinga mwamuvi.
The Bible in Mbunda ©The Bible Society of Zambia, 2006