Visimo 13
13
1Mwana wa mana atolilila omo ishe amunangula, oloni mwana wa likamba kesi kutolilila ku vije vamunangula.
2Vanu vavavwa vakavana cikandelela a vije vyavivwa vendeka, oloni vanu vaka-makuli vakasinganyeka lika vyuma vya lwozi.
3Nyanyama ku vyuma vije wendeka, co ukanyunga mwonyo wove, nga wendeka lishamena ukanyonga.
4Mulwa nameme ashaka vati cuma oloni kakaciwana, oloni muka-kuundangana manene akawana vyuma vyoshe vije vyashaka.
5Vaka-vushunga vazinda makuli, oloni majwi a vaka-vuvi apwa a shwamwa nakuviililisa.
6Vushunga vunyunga uje kesi na mulonga, oloni vuvi vuwisa vaka-vuvi.
7Vanu vamo vakalipwisa ngwe vaka-kufuka, oloni kuvesi na vufuko, co vamo vakalipwisa ngwe vaka-kuutwa, oloni vali na vufuko vwavungi.
8Muka-kufuka akapangesa vimbongo vyendi mukwamena mwonyo wendi, oloni naumo wai akashungwiya muka-kuutwa.
9Vaka-vushunga vanapu ngwe ceke cakutwa manene, oloni vaka-vuvi vanapu ngwe ndeya yakuzima.
10Kulyalesa kunena vukalu, oloni mana ali muli vaje vatolilila kukuvanangula.
11Vufuko vwakuwana mu ngila yaivi vukahu vwasi-vwasi, oloni uje avuwana nakuundangana kwendi vavenya akakala navwo vwavungi.
12Omo cinyangavili cinahu, co na mbunge inoloka, oloni vije ushaka nga unaviwana, co ujolela.
13Nga uvyana vilongesa vya Njambi, co ulinenela tuyando, oloni uje ononoka mashiko endi vakamwana cikandelela.
14Vilongesa vya muka-mana vyapwa lisima lya mwonyo, ngeci munu atenguluke kutunda ku vinganjo vya kutsa.
15Mana awanesa kasingimiko, oloni vaje vaka-kujeneka kukulaela vali mu ngila yakuya kukunyonga.
16Vaka-mana simbu yoshe vakalivanga kuyongola simbu kanda vapange, oloni vilema vambulula vya vulema vwavo.
17Miluwa va kulongwa vakanene tuyando, oloni vaje vaka-kukulaela vakanene kwoloka.
18Uje avyana kumunangula akapwa muka-kuutwa nakuziva shwamwa, oloni woshe uje atolilila kukumunangula vakamusingimika.
19Cinapu cacivwa manene kuwana vije viwushaka, oloni vilema vakavyana kutenguluka kutunda ku vuvi.
20Uje enda na vaka-mana apwa muka-mana lalo, oloni uje enda na vilema akanyonga.
21Tuyando tukavangeya vaka-vuvi kwoshe-ikwoshe kuvaya, oloni vaka-vushunga vakavana cikandelela ca vyuma vyavivwa.
22Munu wamuvwa asezela vatekulyendi vushwana, oloni vufuko vwa vaka-vuvi vakavwambata kuli vaka-vushunga.
23Mahya a tuutu mwasa kwija vimbuto vyavingi, oloni vaka-muuka vavitundisamo.
24Nga kuunyanyamesa munove kuwesi nakumuzema, oloni nga wamuzema umunangula.
25Vaka-vushunga vali na vyakulya vyavingi, oloni vaka-vuvi simbu yoshe vali na njala.
The Bible in Mbunda ©The Bible Society of Zambia, 2006