Visimo 12
12
1Woshe uje azema mana azema kumunangula, oloni uje azinda kumwendekela napu cilema.
2Munu wamuvwa akawana kutetela kuli Shukulu Kalunga, oloni Shukulu Kalunga ahisa munu muka-matumbe amavi.
3Vuvi kuvwasa kwana kwoloka, oloni vaka-vushunga vakemana mbe ngwe muti uli na mizi yawo mu livu.
4Munakazi wamuvwa napu cuma ca seo kuli munalume wendi, oloni munakazi uje azivisa shwamwa munalume wendi, napu ngwe mushongo wa lulanga mu vitsiya vya munalume wendi.
5Matumbe a vaka-vushunga apwa amavwa, oloni kunangula kwa vaka-vuvi kwapwa kwa makuli.
6Kunangula ca makuli capwa mweto wauvi, oloni kunangula ca vushunga capwa ngwe ntelo.
7Vaka-vuvi vakavalwisa, co kuvaseze vatekulwila, oloni voshe vaje vaka-vushunga kuvakavawisila asi.
8Munu muka-mana vakamushangazala, oloni cilema vakamukenga na shwamwa.
9Mwamuvwa kupwa munu wangoco mukupangela kuyoya, kutuvakana kulyaka ku vukama oku uli na njala.
10Muka-vushunga anyunga mwamuvwa vimuna vendi, oloni vaka-vuvi vakala na muuka ku vimuna vavo.
11Ndimi muka-kuundangana manene akakala na vyakulya vyavingi, oloni cinapu vulema kuviisila simbu a vyuma vyangoco.
12Vaka-vuvi vakashaka kuwana vyuma vyavivi ngeci vavilinge, oloni vaka-vushunga vemana mbe ngwe muti uli na mizi yawo mu livu.
13Muka-vuvi akalitela nganjo ikeye vavenya na majwi endi a makuli, oloni muka-kulongwa akalitundisa ikeye vavenya mu vukalu.
14Cikandelela cove nambe kunyanyama kwove kunemana a vyuma vije wendeka, na vyuma vije ulinga.
15Vilema simbu yoshe vakayongola ngeci vakevo vazivuka vyuma vyavivwa manene, oloni vaka-mana vakatolilila kukuvanangula.
16Kuluvala cinapu vulema, oloni kulimbulula matuka kunapu cuma ca mana.
17Mukaleo wa vushunga akambulula vukaleo vwa vushunga, oloni mukaleo wa makuli akambulula vukaleo vwa makuli.
18Kwendeka majwi a lishamena avinjisa ku mbunge ngwe munu vativi moko ya mukwale, oloni majwi akwendeka mwamuvwa akahwimisa mbunge.
19Muka-makuli akayoyo kasimbu kakandondo lika, oloni muka-vushunga akayoyo myaka yoshe.
20Visinganyeka vyavivi vyapwa vya makuli, oloni viyongola vyavivwa vinena kuvwaelela.
21Nacimo cuma cacivi cai ciija kuli muka-vushunga, oloni vaka-vuvi vakawana lika tuyando.
22Shukulu Kalunga wazinda vanu vaka-makuli, oloni avwaelela na vanu vaje valinga vya vushunga.
23Vaka-mana vakasimpi na vyuma vije vazivuka, oloni vilema vambulula lika vulema kwoshe-ikwoshe.
24Undangana manene, co upwa u ntwama, kala na vulwa, co upwa u ndungo.
25Cishota-mbunge capwa citele cakulema, oloni majwi a ngozi anena kuvwaelela.
26Muka-vushunga napu cimweso ku mukwavo, oloni ngila ya muka-vuvi ivazimbalesa.
27Nga wapwa u mulwa kuwasa kuwana vije viwushakezeka, oloni nga uundangana, co ukavezika.
28Vushunga vwapwa ngila yakuya ku mwonyo, co vuvi vwapwa ngila yakuya ku kutsa.
The Bible in Mbunda ©The Bible Society of Zambia, 2006