Visimo 11
11
1Shukulu Kalunga wazinda vanu vaje vapangesa vipeseleso vya makuli, oloni avwaelela na vipeseleso vyavivwa.
2Vaka-kulyalesa vakaziva shwamwa, oloni vaka-kulikeesa vakakala na mana.
3Nga unapu u muka-vushunga, kulongwa kukakutwamenena, oloni nga u munu wakuyoya kwa kupenga-penga, kupenga-penga kwove kukakunyongesa.
4Vufuko vukapwa vwangoco a litangwa lyove lya kutsa, oloni kulongwa kwasa kwamena mwonyo wove.
5Kulongwa kulingisa muka-vushunga kuyoya mwamuvwa, oloni muka-vuvi akawa a vuvi vwendi vavenya.
6Vushunga vwa muka-kulongwa vukamupatula, oloni munu uje kuvasa kumukulaela, atsa ku muuka wendi.
7Omo muka-vuvi atsa, cinyangavili cendi citsa amo nendi. Kukulaela vufuko kukwesi na seo.
8Shukulu Kalunga akanyunga vaka-vushunga ku tuyando, co tuyando otu twija ku vaka-vuvi.
9Visimutwiya vya vaka-kujeneka kukulaela, vyasa kukuviisa, oloni mana a vaka-vushunga asa kukwamena.
10Vivezikiso vya vaka-kulongwa, vikanenela nganda kuvwaelela, omo vaka-vuvi vatsa, co kukakala kujolela.
11Nganda ipwa yakama omo Shukulu Kalunga avezikisa vaka-vushunga, oloni majwi a vaka-vuvi, asa kuviisa nganda.
12Cinapu cuma ca vulema kushendumuna vakweni. Nga uli na mana, co lyolokele lika kuluu.
13Muka-lufwe wai wamukulaela kushweka vyuma, oloni wasa kukulaela munu wa vushunga.
14Lifuti liwa nga kulyesi na vaka-kutwamenena va mana, oloni nga kuli vaka-kunangula vavangi, co kukala kwoloka.
15Uje ana kapopo ku mulonga wa mungenzi akamona vukalu, oloni uje kalingi cuma eci akakala mwamuvwa.
16Munakazi muka-mema ku mbunge vakamusingimika.
Oloni vanalume va lwozi vawana lika vufuko.
17Muka-ngozi anyunga mwamuvwa mwonyo wendi, oloni munu wakukaluka aliyandesa lika ikeye vavenya.
18Vanu vavavi kuvasa kuwana cuma cimo, oloni nga ulinga mwa vushunga co ukawana cikandelela.
19Munu woshe-iwoshe uje alinga mwa vushunga akayoya, oloni woshe uje akakateya kulinga vyavivi akatsa.
20Shukulu Kalunga wazinda vanu vaka-vimbunge vyavivi, oloni azema vaje vaka-kulinga vya vushunga.
21Zivukeni ngeci vaka-vuvi vakavahisa, oloni vaka-vushunga vakovoka.
22Vuvwa vwa munakazi wa mana, vunalifu na kanzeya ka ngolinde kali ku lijulu lya ngulu.
23Vaka-vushunga vakashungwiya vyuma vyavivwa, oloni vaka-vuvi vakakushungwiya lika vije vyavikalu.
24Vanu vamo vakapangesa vimbongo vyavo mwoshe muvashakela, oloni anga vacili na vufuko. Co veka vali na vun̄ondi, oloni anga vanapu lika vaka-kuutwa.
25Pwa muka-kwana co ukavezika. Kwasa vakweni, co nove vakakukwasa.
26Vanu vakasingi munu uje omina vimbuto, oloni vashangazala uje avilandesa na ndando yaindondo.
27Eseka na nzili kulinga mwamuvwa, co uwana vasamba, ya nakushakezeka vukalu, co ukavuwana.
28Vaje vakulaela a vufuko vwavo, vakatotomoka ngwe maputa a nyangao, oloni vaka-vushunga vakakola mbe, ngwe maputa a ndombo.
29Munu uje anenela tuyando naanga yendi, kakawana cuma cimo ku mamaneselelo endi.
Vilema vya vanu simbu yoshe vapwa vangamba va vaka-kunyanyama.
30Yoya mu vushunga, co uwana mwonyo, oloni lwozi lutwala lika ku kutsa.
31 #
1 Pet 4:18
Vaka-vushunga vakawana cikandelela ano asi. Oloni mwa vushunga vaka-kupenga-penga, na vaka-vuvi, Njambi akavahisa.
The Bible in Mbunda ©The Bible Society of Zambia, 2006