Filipu 4
4
Vyakulongesa
1Ngecivene, vasamba vange, vanjazema manene, njinamizivila vulika vwakama manene! Mukanjivwaelelesa manene, co njikalyalesela manene ali yeni lalo! Vasamba vange vanjazema, omu mukemwo mumunapande kwimana mbe mu mwonyo weni muli Mwene.
2Yondiya na Sintike, vakwetu, njilinakumilomba ngwange esekeni kulizivasana ngwe vandokazi muli Mwene. 3Co nove lalo, muka-kupanga amo nange wa kulongwa, njishaka ukwase ava vanakazi, omwo vakevo vanapanga amo nange manene mukushandola muzimbu wauvwa, amolika na Kelemente na voshe veka vaka-kupanga amo nange, vaje mazina avo ali mu livulu lya Njambi lya vaka-kuyoya.
4Joleleni muli Mwene simbu yoshe, njicendekamo lalo ngwange, joleleni!
5Mweseni kalemeso kuli vanu voshe. Mwene alinakwija ololo. 6Kesi mushote mbunge a cuma cimo, oloni mu malombelo eni oshe lombeni a Njambi a vije munajeneka, simbu yoshe mulombeni na mbunge yakukandelela. 7Co kwoloka kwa Njambi, kuje munu naumo wai asa kuzivisisa, cikanyunga vimbunge vyeni na viyongola vyeni mwamuvwa muli Kilistu Yesu.
8Mukumanesa, vasamba vange, shuliseni viyongola vyeni na vyuma vije vyavivwa vije vasa kushangala, vyuma vije vinapu vya vushunga na kalemeso na kuvwaa na kujela na vuvwa na kasingimiko. 9Lingeni vipangi vije mwalilongesele nakuvitambula kuli yange, ku majwi ange na ku vilinga vyange. Co Njambi uje muka-kutwana kwoloka akakala amo neni.
Kukandelela a vwana
10Njijolela manene muli Mwene omwo nambe kuneti simbu yakama ololo munendula lalo cizango cakunjikwasa. Kunjendeka ngwange mwalikelele kunjikwasa, oloni kumwasele kuwana ngila yakucilinga. 11Co kunjesi nakwendeka eci ngwe omwo njamono ngwange munanjecelela embwe, omwo njalilongesa kupwa muka-kupwisamo na vije njilinavyo. 12Njazivuka kukala mukujeneka, co njazivuka kukala nevi vyavingi vyakuhyana vije vyanjipande. Njalilongesa cisin̄iko eci, mu vyoshe na kwoshe njikajolela nambe njinakuta nambe njili na njala, nambe njili na vyavingi nambe vyavindondo manene. 13Njasa kulinga vyuma vyoshe a nzili ije yananjana Kilistu.
14Oloni capwile cacivwa manene kuli yeni akunjikwasa mu tuyando twange. 15#2 Koli 11:9 Co neni lalo vaka-Filipu mwazivuka mwamuvwa ngweni omo njatundile ku Masendoniya mu matangwa akulivanga akwambulula Vin̄anda Vyavivwa, kuvanga vaka-cikungulukilo ceni lika mwanjikwasele, kuvanga yeni lika vamo mwalipangelele nganyo yange nakujeneka kwange. 16#Vil 17:1 Omwo a visimbu vyavingi omo njajenekele vyakulikwasa navyo mu Tesalonika, yeni mwanjikwasele. 17Kesi ngwe yange njishaka lika vwana kuli yeni embwe, oloni njishaka kumona nganyo yakuwezelela ku mbango yeni. 18#Kut 29:18 Ngecivene, njilinakutuma vukaleo vwa vyuma vyoshe vije mwatumine kuli yange, vikevyo vyajawisa kujeneka kwange kwoshe! Ololo njili nevi vyoshe njishaka omwo Epafolonditu nanjinenela vwana vweni vwoshe. Vukevwo vunapu ngwe mulambu wakunika lwengo lwaluvwa kuli Njambi, n̄ombelo ije yatambula nakumuvwaelelesa ikeye. 19Co Njambi yange akamyana vyuma vyoshe vije mushaka ngwe kukujeneka kweni muli Kilistu Yesu. 20Kuli Njambi yetu na Tatetu kukale vumpau ku myaka na myaka! Ewa.
Viindu vyakumanesela
21Viindu kuli voshe vanu va Njambi vaje vanakundama kuli Kilistu Yesu. Vaka-kutava vali kuno amo nange vanatumu viindu vyavo kuli yeni. 22Vanu va Njambi voshe kuno vanatumu viindu vyavo, vunene kuli vaje vanakundama ku lipela lya Nguvulu.
23Kutetela kwa Mwene Yesu Kilistu kukale amo neni voshe.
Currently Selected:
Filipu 4: MBB
Highlight
Share
Copy
Want to have your highlights saved across all your devices? Sign up or sign in
The Bible in Mbunda ©The Bible Society of Zambia, 2006