Filipu 3
3
Vushunga vwavuvwa
1Mukumanesela, vasamba vange, joleleni mu kulitombola kweni muli Mwene. Kunjesi na shwamwa akwilukilamo vije vinjasonekele laja, co eci cimikwasa nga njilingamo. 2Nyanyameni kuli vaje valinakulinga vyuma vyavivi, vaje tutali, vanu vaje vakala na futisi yakulilengozola a mivila yavo. 3Omwo yetu, kesi ngwe vakevo embwe, twatambula kutuuka kwa vushunga, omwo yetu tukalemesa Njambi a Munzinzime wendi, co tunavwaelela a mwonyo wetu ou muli Kilistu Yesu. Kutwasa kukulaela cisemwa ca vunu. 4Nameme yange nga njinasa kukulaela vyuma vya cifwa cangacije. Nga umo weni aliyongola ngwendi asa kukulaela mu cisemwa ca vunu, yange njahyana manene a ngila eyi. 5#Vil 23:6; 26:5; Lom 11:1 Vanjituwile a litangwa lyamucitanu na atatu. Ku cisemwa cange yange njapwa nji kaIsalele, wa ku muyati wa Mbenjemani, ku maninga nji kaHevelu mpundu. Ngecivene, akunyunga Lishiko lya vaYunda, njapwa nji kaFaliseo, 6#Vil 8:3; 22:4; 26:9-11 co njakele na ntwima yakama mukupakesa cikungulukilo. Ngwe munu asa kupwa muka-vushunga akwononoka Lishiko, yange kunjakele na mulonga. 7Oloni vyuma vyoshe vije njalavele ngwe vili na nganyo, ololo njilinakuvilava kupwa vyangoco, omwo a lizina lya Kilistu. 8Kesi lika a vyuma vije embwe, njilinakulava vyuma vyoshe ngwe vinapu vyangoco omwo seo yakama, yakuzivuka Kilistu Yesu Mwene yange. Omwo ali ikeye njinombila vyuma vyoshe, kuli yange njilinakuviyongola ngwe vinapu mazilo, ngeci njinganyale Kilistu, 9ngeci njikale muli ikeye. Yange kunjesi na vushunga vwange vavenya vwai, vuje vasa kuwana akwononoka Lishiko. Ololo njili na vushunga vuje vananjana akukulaela lika kuli Kilistu, vushunga vuje vutunda kuli Njambi, co nsina yavwo inapu kukulaela. 10Cuma cinjishaka a vyoshe evi cinapu kuzivuka Kilistu nakumona nzili ya cisangukilo cendi, kulipangela tuyando twendi nakupwa ngwe ikeye mu kutsa kwendi, 11mukukulaela ngeci yange vakanjisangule kutunda ku kutsa nakuya ku mwonyo.
Kushatuka kweta na ku shongo
12Kunjendeka ngwange njinahyana laja mu cuma eci embwe, nambe ngwange njajele laja embwe. Oloni njilinakukakateya mukweseka kuwana cikandelela cije Kilistu Yesu nanjitambwilaco laja. 13Mwa vushunga vene, vasamba vange, kunjasa#3:13 KUNJASA KUYONGOLA: Kunungulula kumo ngwavo, kanda njiyongole. kuyongola ngwange njacitambula laja embwe, nameme ngoco, njilinga cuma cimolika, njivale vyuma vili munima yange, co njilyolwela kuli vije vili kulutwe lwange. 14Ngecivene, njilinakushatukila kulutwe nakushungama kuya ku mamaneselelo ngeci njikatambule cikandelela cije cinapu kusana kwa Njambi ali Kilistu Yesu ku mwonyo uli mwilu.
15Yetu voshe tunakolo mu vyuma vya munzinzime tunapande kukala na mbunge yangacije. Oloni nga vamo veni vali na cifwa ca muyati weka, Njambi akasholola mwamuvwa cuma eci kuli yeni. 16Nameme ngoco, oloni tuyeni kulutwe ngwe ku mashiko aje tunakavangeya kweta ku lelo.
17 #
1 Koli 4:16; 11:1 Vasamba vange, njitembunwineni yange. Kengeni kuli vaje valinakukava cimweso ca vushunga cije twamisezelele. 18Njamilekele laja visimbu vyavingi kunima cuma eci, co ololo njilinakwilukilamo lalo nakulila na misozi, kuvali vavangi vaje kuyoya kwavo cinavemukisa kupwa vitozi va kutsa kwa Kilistu a cilindakano. 19Vakevo valinakuya ku mbulu ya tuhya, omwo njambi yavo napu mashungu a mivila yavo. Vakevo valyalesa na vyuma vije vyapandele kuvazivisa shwamwa, co valinakuyongola lika vyuma vyakundama ku vije vili ano asi. 20Oloni yetu vundambo vwetu vuli mwilu, co tulinakutatamena Mwovole wetu alinakwija kutunda mwilu, ikeye Mwene Yesu Kilistu. 21Ikeye akemukisa mivila yetu yakuvotsiya ya kutsa nakuyipwisa ngwe muvila wendi vavenya wa vumpau, kupangesa nzili ije ikeye asa kunena vyuma vyoshe mwisi yakushika kwendi.
Currently Selected:
Filipu 3: MBB
Highlight
Share
Copy
Want to have your highlights saved across all your devices? Sign up or sign in
The Bible in Mbunda ©The Bible Society of Zambia, 2006