Filipu 2
2
Kulikeesa kwa Kilistu na vukama vwendi
1Myonyo yeni muli Kilistu ilinakumyana nzili, na cizemo cendi cilinakumizembeleka. Muli na kulitombola na Munzinzime,#2:1 MULI NA KULITOMBOLA NA MUNZINZIME: Nambe, Munzinzime naminena mu kulitombola umo na mukwavo. co muli na mbunge ya ngozi nakulitetela umo na mukwavo. 2Ngecivene, njimilambelela munjivwaelelese akukala na viyongola vimo nakulipangela cizemo cimo, nakupwa cuma cimo mu mwonyo na mu mana. 3Kesi mulinge cuma cimo na viyongola vya cipululu, nambe na mashungu akulishasha; oloni likeeseni ku mesho a umo na umo, simbu yoshe yongoleni vakweni ngwe vanapu vavavwa kumihyana yeni. 4Simbu yoshe shakezekeni vije vyasa kuvwaelelesa vakweni veka lalo, kesi mulivwaelelese yeni vavenya. 5Akati keni kaleni na mbunge ya cifwa cije cakele naco Kilistu Yesu.
6Ikeye simbu yoshe wakele na cifwa ca Njambi,
oloni kayongwele kupwa amo na Njambi, cuma cakukakateya.
7Oloni, a cizango cendi vavenya wecelele vyoshe wakele navyo,
co watambwile cifwa ca ngamba vene.
Wasemukile vene ngwe mwakasemuka munu woshe,
washolokele mu cifwa ca vunu.
8Co walikeesele nakwenda mu ngila yakwononoka kutwala ku kutsa kwendi,
kutsa kwendi a cilindakano.
9Omwo a cuma eci Njambi wamwimikile nakumwaka a mwela wa akama,
nakumwana lizina lyakama kuhyana lizina lyoshe.
10 #
Isa 45:23
Ngecivene, vyuma vyoshe vili mwilu, nevi vili ano asi,
nevi vili mwisi ya kaye,#2:10 MWISI YA KAYE: Vayongwele ngeci vatsi vatwaleleleo kuyoya mu lifuti lya lisusulungu mwisi ya livu.
vikatsikama a mavuli, mukwana kalemeso lizina lya Yesu,
11co voshe vakambulula ngwavo Yesu Kilistu ikeye Mwene,
ku vumpau vwa Njambi Tatetu.
Tweni ceke muno mu kaye
12Ngecivene, vasamba vange, ngwe simbu yoshe mwanjononokele omo njakele neni amo, mukemwo vene cuma cakama munapande kunjononoka nambe yange njiwaiko. Kakateyeni mu vipangi na lyova nakujaja ngeci mumanese kwovoka kweni, 13omwo simbu yoshe Njambi alinakupanga muli yeni ngeci mukale na cizango, co ngeci mwase kwononoka vutumbe vwendi vavenya.
14Lingeni vyuma vyoshe kujeneka kulinyenyeta nambe kulikanangana, 15#Kwi 32:5 ngeci mupwe vaka-kujeneka mulonga na vaka-kujeneka kapayo ngwe muvanapande kupwa vana va Njambi, vaje valinakuyoya mu kaye ka kupenga-penga na akati ka vanu vaka-vuvi. Yeni munapande kutwa ceke akati kavo ngwe vingongonosi vitwa ceke mwilu, 16omo muvambulwila lijwi lya mwonyo. Nga mulinga ngacije, njikakala na cuma cakulyalesela ali yeni a Litangwa lya Kilistu, omwo eci cikasholoka ngeci nzili yange yoshe na vipangi vyange kuvyaile mwangoco embwe.
17Nambe nga vetila maninga ange ngwe mulambu wa a n̄ombelo ije yakukulaela kweni kuli Njambi, njivwaelela nakujolela amo neni voshe. 18Mu ngila eyi vene, neni lalo munapande kuvwaelela na kujolela amo nange.
Timateo na Epafolonditu
19Nga cinapu cizango ca Mwene, njili na cinyangavili cakutuma Timateo vwasi kuli yeni, ngeci akunjitakamese na vin̄anda vyakutunda kuli yeni. 20Kunjesi na munu wakulifwa nendi, uje ali na cizango ngwe cange, co uje ali na cishota-mbunge ali yeni. 21Munu na munu alinakulimwena vyendi vavenya, kesi a vin̄anda vya Yesu Kilistu. 22Oloni yeni vavenya mwazivuka vatijo Timateo nasholola vukaleo vwendi, ikeye napu ngwe mwana alinakupanga amo na ishe a muzimbu wauvwa. 23Ngecivene, njilinakuyongola kumutuma kuli yeni vwasi-vwasi, omwo njimona vati vyuma muvyendela kuno kuli yange. 24Co njakulaela kuli Mwene ngeci yange vavenya njikasa kwija kuli yeni ololo vene.
25Njayongola ngwange cinapande ngeci njitume ndolome yetu Epafolonditu, uje wapangele nakulwila ku mutambela wange, co napanga ngwe ngamba yeni mukunjikwasa. 26Ikeye ashaka manene kumimona yeni voshe, co ali na cishota-mbunge cakama manene omwo mwazivile ngeci ikeye wakele nakuvinja. 27Mwa vushunga vene wakele nakuvinja nakushaka kutsa vene. Oloni Njambi wamuzivilileko mema ku mbunge, kesi lika ikeye oloni nange lalo, nakunjitetela ku vusiwa vwakama manene. 28Njili na cishota-mbunge cakumutuma vwasi kuli yeni, ngeci mwakujolele lalo omo mwakumumona, co vusiwa vwange vukahwa. 29Ngecivene, mutambuleni nakujolela, ngwe muka-kukulaela muli Mwene. Shololeni kalemeso kuli voshe vanu va cifwa cangacije ngwe ikeye, 30omwo waanene mwonyo wendi, co washakele kutsa omwo a vipangi vya Kilistu, ngeci anjikwase kuli vije yeni kumwasele kunjana.
Currently Selected:
Filipu 2: MBB
Highlight
Share
Copy
Want to have your highlights saved across all your devices? Sign up or sign in
The Bible in Mbunda ©The Bible Society of Zambia, 2006