Mako 6

Yesu vamuvyana ku Nazaleta

(Mat 13:53-58; Luk 4:16-30)

1Yesu watundile kuje welukile kwimbo lyendi, co vandongisi vendi vamukavele. 2Co a Litangwa Lyakuhwima washangumukile kulongesa mu sinangonge. Vanu vavangi vakele kuje, co omo vamuzivile, valikomokelele valihozwele ngwavo, “Kulijo nawana evi vyoshe?” Co vendekele lalo ngwavo, “Kuli nawana mana awa? Vati alinakulinga vizivukiso vyakufwa ngacije? 3Kuma kesi ikeye muka-kushonga, muna Maliya, na ndolome ya Yakomba, na Yosefa, na Yundasa, na Simoni ndi? Co kuma kutwesi na vandokazi vendi kuno ndi?” Co vakevo vamuvyanene.

4 # Yow 4:44 Co Yesu wendekele kuli vakevo ngwendi, “Muka-kwimanena kesi na kasingimiko hembo lyendi na ku vavushoko vwendi na ku naanga yendi kuvanga kweka.”

5Co kasele kulinga cizivukiso cimo kuje, kuvanga lika wakambekele mavoko endi ali vanu vavandondo vaka-kuvinja, co wavakangwisile. 6Co walikomokelele, omwo vanu kuvakulaelele.

Yesu atuma vandongisi likumi na vavali

(Mateo 10:5-15; Luka 9:1-6)

Asinoni Yesu waile ku membo akwatako, walongesele vanu. 7Co wasanene vandongisi likumi na vavali vaije kuli ikeye, co wavatumine vavali, vavali. Co wavanene moko yakutundisa minzinzime yakujwala, 8#Luk 10:4-11 co wavashikile ngwendi, “Kesi mwambate cuma cimo a vungenzi vweni kuvanga mulamu lika, kesi mwambate likende, nambe lipakumuna, nambe vimbongo mu vinkombe vyeni. 9Oloni zaleni vin̄aku, kesi mwambate lalo cikoveyo ceka camucivali.” 10Co wavalakele lalo ngwendi, “Kwoshe kuje kuvakamitambula mwamuvwa, tumbameni ku njuvo ije vene noo mukatunda ku mwela uje. 11#Vil 13:51 Co nga muketa ku nganda imo kuje vanu kuvakamitambula mwamuvwa nambe kumitolilila, tundeniko, co totomoneni likungu ku myanja yeni. Eci cikapwa vukaleo kuli vakevo.”

12Ngecivene, vaile nakwambulula kuli vanu ngeci vatenguluke ku vingila vyavo vyavivi. 13#Yak 5:14 Co vatundisile minzinzime yakujwala yaingi, co vavwavesele mazi vaka-kuvinja vavangi nakuvakangwisa.

Kutsa kwa Yowano Muka-kumbwitika

(Mateo 14:1-12; Luka 9:7-9)

14 # Mat 16:14; Mak 8:28; Luk 9:19 Mwene Helonde#6:14 MWENE HELONDE: Helonde Antipase, uje washwanene mu Ngalileya. wazivile evi vyoshe, omwo lutsimo lwa Yesu lwaile kwoshe-ikwoshe. Vanu vamo vakele nakwendeka ngwavo, “Yowano Muka-kumbwitika nasanguka ku vatsi! Mukemwo ali na nzili yakama yakulinga vizivukiso.”

15Oloni vamo vendekele ngwavo, “Ou ikeye Elinja.” Vakwavo vendekele ngwavo, “Ikeye muka-kwimanena, wakulifwa na umo wa vaje vaka-kwimanena va ku san̄ulu.”

16Oloni omo Helonde wazivileko, wendekele ngwendi, “Ikeye Yowano Muka-kumbwitika, uje njatapele mutwe, oloni nasanguka lalo ku vatsi!” 17#Luk 3:19-20 Omwo Helonde washikile ngeci vakwate Yowano, co wamukutile nakumwaka mu kamenga. Helonde walingile evi omwo ali Helondiya, uje yambatele Helonde, wapwile munakazi wa ndolome yendi Filipu. 18Omwo Yowano Muka-kumbwitika walekele Helonde ngwendi, “Kesi mwamuvwa kwambata munakazi wa shongo yove!”

19Ngecivene, Helondiya wakele na likiti-kiti ali Yowano, co washakele kumutsiya, oloni kasele omwo ya Helonde. 20Omwo Helonde wakele na lyova ali Yowano omwo ikeye wazivukile ngeci Yowano wapwile muka-vushunga, co wakujela, co wamunyungile mwamuvwa. Helonde wazemene manene kutolilila kuli Yowano, nameme ikeye wakele nakumuzivisa longoto ku mbunge simbu yoshe yamutolililile.

21Oloni akukotoka Helondiya wawanene ngila. Omo litangwa lyakwanuka kusemuka kwa Helonde, walingilile ciwano cakama vaka-kushwana vendi voshe, na vaka-kushika nzita, na vanu va vulemu va mu Ngalileya. 22Co muna Helondiya wa munakazi wezile wakinine, wavwaelelesele Helonde na vaje vangenzi vakelemo. Ngecivene, mwene wendekele kuli uje mumbanda ngwendi, “Njilombe cuma coshe ciwushaka, co njikakwanaco.” 23Co wendekele nakulisinga kuli ikeye ngwendi, “Njilisinga ngwange cuma coshe ulomba njikakwanaco, nameme litambelo lya vumwene vwange!”

24Ngecivene, uje mumbanda waile kuli vaina, co wavehwile ngwendi, “Vika njinapande kukalomba kuli Helonde?”

Co vaina vamukumbulwile ngwavo, “Mutwe wa Yowano Muka-kumbwitika.”

25Co uje mumbanda welukile vwasi-vwasi kuli mwene nakumulomba ngwendi, “Njishaka munjane ololo vene mutwe wa Yowano Muka-kumbwitika a lilonga!”

26Co mwene wakele na vusiwa manene, oloni kasele lalo kumuvyana omwo a cikulaeso cije walisingile ku mesho a voshe vaje vatumbamene nendi amo ku mesa. 27Ngecivene, watumine muka-kunyunga nakumushika ngwendi vanene vwasi mutwe wa Yowano. Muka-kunyunga watuukile, waile ku kamenga, co wakatapele Yowela mutwe, 28asinoni waunenele a lilonga wawanene kuli uje mumbanda, co uje mumbanda wautwalele kuli vaina. 29Omo vandongisi va Yowano vazivile vyuma evii, vezile nakwambata muvila wendi, co vakautsindile.

Yesu alisa vanalume vakupwa 5,000

(Mateo 14:13-21; Luka 9:10-17; Yowano 6:1-14)

30Miluwa va Yesu velukile valiwanene na Yesu, vamulekele vyoshe vije vivalingile nakulongesa. 31Co vanu vavangi vakele nakulyendasana, co Yesu na vandongisi vendi kuvasele nameme kuwana simbu yakulya. Ngecivene, Yesu wendekele kuli vakevo ngwendi, “Tuyeni ku mambo kwetu lika tukahwimeko tai.” 32Ngecivene, vakovelele mu vwato vaile ku mambo kwavo lika.

33Vanu vavangi vavamwene omo vaile, co vavazivukile, ngecivene, vasezele membo avo oshe vashatukilile lumbisi a nunda nakweta ku mutambela uje kulutwe lwa Yesu na vandongisi vendi. 34#Kul 27:17; 1 Vim 22:17; 2 Miz 18:16; Ezek 34:5; Mat 9:36 Omo Yesu watundile mu vwato, wamwene mbunga yakama, co wavazivilile mema ku mbunge, omwo vapwile ngwe vimanga vakujeneka kanyungi. Ngecivene, washangumukile kuvalongesa vyuma vyavingi. 35Co omo kwapwile cingwezi, vandongisi vendi vezile kuli ikeye vendekele ngwavo, “Litangwa linatoko laja, co muno mu mambo. 36Shandola vimbunga evi, ngeci vaye ku mahya na ku membo amuyehi vakalilandele vyakulya vakevo vavenya.”

37Oloni Yesu wavakumbulwile ngwendi, “Yeni vene vaaneni vyakulya ngeci valye.”

Co vamwihwile ngwavo, “Kuma yove ushaka tuye nakulanda makende a vimbongo vya siliva#6:37 VIMBONGO VYA SILIVA: Mbongo ya siliva yapwile fweto ya a litangwa. Kenga Mateo 20:2. vyakupwa 200 ngeci vakulye ndi?”

38Co Yesu wavehwile ngwendi, “Muli na makende angai? Yeni mukaamone.”

Omo vakaawanene, co vamulekele ngwavo, “Mikasha ya makende itanu na visi vavali.”

39Asinoni Yesu walekele vandongisi vendi ngeci valeke vanu voshe vatumbame asi mu vimbunga na vimbunga a mwila wakuzivuluka. 40Ngecivene, vanu vatumbamene asi mu mikana, mbunga imo vakele 100 na mbunga ikwavo vakele makumi atanu. 41Asinoni Yesu watambwile ije mikasha ya makende itanu na visi vavali, wakengele mwilu, co wakandelele kuli Njambi. Wapazwile ije mikasha ya makende wayanene kuli vandongisi vendi ngeci vapangezele vimbunga vya vanu. Co na vaje visi vavali lalo wavapangezelele mukati kavo. 42Co voshe valile vakutile. 43Asinoni vandongisi vakungulwile vimbazuvwila vije vyasaleleo vya makende na visi vashulisile mitonga likumi na ivali. 44Co vanu vaje valile vapwile vanalume 5,000.

Yesu enda akamwa ya mema

(Mateo 14:22-33; Yowano 6:15-21)

45Aje vene Yesu wasindiiye vandongisi vendi ngeci vakovele mu vwato valivange kuya kulutwe ku Mbetesainda, musambwa ya lishali, omo simbu ikeye acili nakushandola vanu ngeci vaye. 46Co omo walisalesele na vanu, walamatele ku munkinda nakulombela. 47Co omo litangwa lyatokele, vwato vwakele akati ka lishali, co Yesu wakele endi lika a nunda. 48Co wamwene ngeci vandongisi vendi vali mu vukalu vwakukasha vwato, omwo lihunzi lyakele nakuvapekumuna, a mungulungengu, Yesu wezile kuli vakevo alinakwenda akamwa ya mema. Walingile ngwe alinakuvongoloka, 49oloni omo vamumwene alinakwenda akamwa ya mema. Vayongwele ngwavo, “Ndumba ya munu!” Co vatambekele manene. 50Omo vamumwene, co voshe vazivile lyova.

Oloni vwasi-vwasi Yesu wendekele navo ngwendi, “Simpeni! Yange, kesi muzive lyova!” 51Asinoni wakovelele mu vwato muje muvakele, co lihunzi lyalendamene. Co vandongisi valikomokelele, 52omwo kuvazivisisile mukwanungulukilile kulisa vanu vakupwa 5,000 mana avo kuwazivukile vije vyalingiwile.

Yesu akangwisa vaka-kuvinja mu Ngenesaleta

(Mateo 14:34-36)

53Co omo vajavukile lishali vezile ku lifuti lya Ngenesaleta, co vakutile vwato vwavo mu cikuma. 54Omo vatundile mu vwato, vwasi-vwasi vanu vazivukile Yesu. 55Ngecivene, vashatukilile mu lifuti mwoshe, co kwoshe kuje vamuzivile ngwavo kwali, vamunenelele vaka-kuvinja anga vanalala a manala avo. 56Co kwoshe kuje kwaile Yesu, mu membo, na mu vinganda, na mu mahya, vanu vamutwalelele vaka-kuvinja kuje ku mitambela yakulandesela nakumulambelelela ngeci atave vaje vakele nakuvinja vakwate nameme ku mukundwilo wa cikoveyo cendi. Co vaje voshe vakwateleko vakangukile.

Currently Selected:

Mako 6: MBB

Highlight

Compare

Copy